धुळे, 17 सप्टेंबर : राज्यात एकीकडे गणपती विसर्जनाची लगबग सुरू असताना धुळ्यातून धक्कादायक बातमी समोर आली आहे. धुळे शहराजवळील चितोड गावांमध्ये गणेश विसर्जनाची मिरवणूक निघण्यापूर्वीच मोठी दुर्घटना घडली. गावातील एका ट्रॅक्टर खाली येऊन तीन चिमुकल्या मुलींचा जागीच दुर्दैवी अंत झाल्याची धक्कादायक घटना उघडकीस आली आहे. या अपघातात मृत्यूमुखी पडलेल्यांमध्ये परी शांताराम बागुल (वय 13), शेरा बापू सोनवणे (वय 6), लड्डू पावरा – (वय 3) असे मयत बालकांची नावे असून यात एक महिला देखील गंभीररित्या जखमी झाल्याचे समजते.
काय आहे संपुर्ण बातमी? –
मिळालेल्या माहितीनुसार, गणेश विसर्जनाच्या मिरवणूक निघण्यापूर्वीच गावात उभ्या असलेल्या ट्रॅक्टर ट्रॉलीच्या भीषण अपघाताच्या घटनेने गावात स्मशान शांतता पसरली आहे. ट्रॅक्टरवर चढून ड्रायव्हरने तो सुरू केला. मात्र, या ट्रॅक्टरच्या आजुबाजूला असलेल्या तीन चिमुकल्या मुलींच्या अंगावरुन हा ट्रॅक्टर गेल्यानं त्यांचा जागीच मृत्यू झाला आहे. इथे उभ्या असलेल्या ट्रॅक्टरजवळ या मुली खेळत असताना हा भीषण अपघात घडला असल्याचे समजते.
पोलिसांनी ड्रायव्हरला घेतले ताब्यात –
धुळ्यातील या घटनेमध्ये एक महिला देखील गंभीरित्या जखमी झाल्याची प्राथमिक माहिती समोर आली आहे. तसेच इतर पाच ते सहा जणांचा देखील दुखापत झाल्याचे समजते. दरम्यान, पोलिसांनी घटनास्थळी धाव घेत गुन्हा दाखल करण्याची प्रक्रिया सुरू केली आहे. याप्रकरणी घटनास्थळाची पाहणी करून ट्रॅक्टर ताब्यात घेतला असून ड्रायव्हरला ताब्यात घेत त्याची चौकशी सुरू केली आहे. हा अपघात नेमका कसा झाला, गाडीच्या ड्रायव्हरच्या लक्षात कसं आलं नाही, याचा पोलीस तपास करत आहेत.
गणेश विसर्जन मिरवणुकांच्या उत्साहावर दु:खाचे सावट –
राज्यभरात गणेश मंडळांचे कार्यकर्ते एकत्र जमत बाप्पांच्या मिरवणुकीने बाप्पाला निरोप देण्याची जय्यत तयारी करत आहेत. मात्र, धुळे जिल्ह्यातील या घटनेमुळे गणेश विसर्जन मिरवणुकांच्या उत्साहावर दु:खाचे सावट पसरले असून गावात शोककळा निर्माण झाली आहे.
