ईसा तडवी, प्रतिनिधी
पाचोरा, 27 सप्टेंबर : राज्यात दिवसेंदिवस महिला अत्याचाराच्या घटना समोर येत असताना पाचोरा तालुक्यातून खळबळजनक बातमी समोर आली आहे. तालुक्यातील एका गावात युवतीवर एकाने अतिप्रसंग केल्याची घटना 23 सप्टेंबर रोजी सायंकाळच्या सुमारास घडली. याप्रकरणी पीडितेच्या आईच्या फिर्यादीवरून काल पिंपळगाव हरेश्वर पोलिसांत गुन्हा दाखल करण्यात आला. कडुबा भगवान खरात (रा. लोहारी ता. पाचोरा) असे संशयित आरोपीचे नाव आहे.
नेमकं काय घडलं? –
मिळालेल्या माहितीनुसार, पीडित युवती आईसोबत गुरे चारायला गेली होती. घरी परतण्याच्या वेळी आई पुढे चालत असताना पीडित युवती मागे होती. दरम्यान, संशयित आरोपीने पीडित युवतीचा हात धरत तिला शेतात नेत तिच्यावर अतिप्रसंग केला. यानंतर पीडित युवतीच्या आईने पिंपळगाव पोलीस स्टेशनमध्ये तक्रार दाखल केली.
संशयित आरोपीला अटक –
याप्रकरणी संशियत आरोपीविरोधात विनयभंगाच्या विविध कलमान्वये गुन्हा दाखल करण्यात आला आहे. दरम्यान, संशयित आरोपीला पोलिसांनी अटक केली असून पुढील तपास सहायक पोलीस निरीक्षक प्रकाश काळे यांच्या मार्गदर्शनाखाली पोलीस हवालदार नरेश सुरेश नरवाडे करत आहेत.
हेही पाहा : Jalgaon जिल्ह्यातील एमरजन्सी लोडशेडिंग कधी बंद होणार?, IAS Ayush Prasad Exclusive Interview
