जळगाव, 10 जून : जळगाव जिल्ह्यात अनेक लाचखोरीच्या घटना समोर येत असताना कंत्राटी वायरमन लाच घेतल्याप्रकरणी लाचलुचपत विभागाने मोठी कारवाई केली आहे. जळगावात कंत्राटी वायरमनने तक्रारादाराच्या घरी वीज मीटर बदलण्यासाठी घरी जात त्यामध्ये छेडछाड केले असल्याचे सांगितले. तसेच वीज चोरीचा गुन्हा दाखल न करण्यासाठी स्वतःसह मीटर टेस्टींग करणारे यांच्यासाठी 15 रूपयांची लाचेची मागणी केली. दरम्यान, एसीबीने सापळा रचत त्या कंत्राटी वायरमनला रंगेहात पकडले आहे. भूषण शालीग्राम चौधरी (वय 37) असे त्याचे नाव असून रामानंद नगर पोलीस ठाण्यात गुन्हा दाखल करण्याची प्रक्रिया सुरू आहे.
नेमकं प्रकरण काय? –
मिळालेल्या माहितीनुसार, भूषण शालीग्राम चौधरी जळगावातील प्रभात कॉलनी कक्षात कंत्राट तत्वार वायरमन म्हणून नेमणूकीस होता. असे असताना तक्रारदार यांच्या राहते घराचे वीज मीटर हे पूर्वीचे मालक यांच्या नावे असल्याने महावितरण तर्फे वीज मीटर बदलण्याचे कार्य चालू असताना तीन दिवसापूर्वी वायरमन भूषण चौधरी हे तक्रारदार यांच्या घरी वीज मीटर बदलण्यासाठी आले.
तक्रारदाराकडे केली लाचेची मागणी –
तक्रारदार यांना सांगितले की, तुमच्या वीज मीटरचे सील तुटलेले असून तुम्ही त्यात छेडछाड केल्याने तुम्हाला आर्थिक दंड होऊन तुमच्यावर वीज चोरीचा गुन्हा दाखल होईल. वीज चोरीचा गुन्हा दाखल न करण्यासाठी व वीज मीटर टेस्टिंगचा रिपोर्ट ओके देण्यासाठी भूषण चौधरी याने तक्रारदार यांच्याकडे 15 हजार रुपयांची लाचेची मागणी केली. यानंतर तक्रारदाराने जळगाव एसीबीकडे आज 10 जून रोजी तक्रार दिली.
एसीबीने रचला सापळा अन् पकडले रंगहात –
दरम्यान, तक्रारदाराच्या तक्रारीनुसार एसीबीने आज रोजी पडताळणी केली असता आरोपीने पंचासमक्ष 5000 रुपये लाचेची मागणी करुन लाच स्वीकारण्याची तयारी दर्शविली. यानंतर एसीबीने आज रोजी सापळा रचत भूषण चौधरीस पंचसमक्ष 5000 रुपयांची लाच स्वीकारली म्हणून त्यास ताब्यात घेण्यात आले. याप्रकरणी रामानंद नगर पोलीस ठाणे येथे गुन्हा नोंद करण्याची प्रक्रिया सुरु आहे.
