अमळनेर, 6 जून : जळगाव जिल्हा परिषदेच्या पहिल्या अध्यक्षपदाचा मान गांधलीचे के. एम. भाऊसाहेब यांच्या रूपाने अमळनेरला मिळाला. त्यानंतर त्यांना आमदारकी मिळाली. यानंतर 1971 ला तत्कालीन जळगाव लोकसभा मतदार संघाचे खासदार होण्याचा मान अमळनेरला के. एम. भाऊसाहेबांच्या रूपाने मिळाला. नंतर 1977 मध्ये हा मतदार संघ एरंडोल मतदार संघ झाला. आणि पुन्हा जळगाव लोकसभा मतदार संघ झाला.
यंदाच्या लोकसभा निवडणूक 2024 मध्ये म्हणजे तब्बल 53 वर्षांनंतर हा योग पुन्हा जुळून अमळनेर तालुक्याला स्मिता वाघ यांच्या रूपाने खासदार म्हणून मिळाला. जळगाव जिल्हा परिषदेच्या पहिल्या महिला अध्यक्ष होण्याचा मान देखील स्मिता वाघ यांना मिळाला. त्यांनाही विधानपरिषदेच्या रूपाने आमदारकी मिळाली. आणि आज जळगाव लोकसभा मतदार संघाचा खासदार अमळनेर तालुक्याचा झाला आहे.
विशेष म्हणजे त्यावेळी देखील के. एम. भाऊसाहेब यांच्या विरोधात त्यांचेच निकटवर्तीय त्यांचे शिष्य आचार्य गजाननराव गरुड प्रतिस्पर्धी उमेदवार होते. त्यांचाही मोठ्या फरकाने पराभव झाला होता. आणि यंदाच्या लोकसभा निवडणुकीत स्मिता वाघ यांचे प्रतिस्पर्धी करण पवार त्यांच्याच भाजप पक्षातून फुटून विरोधात उभे राहिले आणि मोठ्या फरकाने पराभूत झाले.
संजय पाटील, अमळनेर
हेही वाचा : Smita Wagh : विजयानंतर स्मिता वाघ Special Interview
