मुंबई : महाराष्ट्र विधिमंडळाचे अर्थसंकल्पीय अधिवेशन आजपासून सुरू होत आहे. यापूर्वी काँग्रेस पक्षाच्या वतीने महाराष्ट्र विधानसभा व विधानपरिषदेतील गटनेते, उपनेते, मुख्य प्रतोद, प्रतोद यांची नियुक्ती करण्यात आली आहे. यामध्ये खान्देशातील काँग्रेस पक्षाचे एकमेव आमदार असलेले शिरीषकुमार नाईक यांना मोठी जबाबदारी देण्यात आली आहे.
अखिल भारतीय काँग्रेसने शनिवारी महाराष्ट्र विधिमंडळातील पक्षाच्या नियुक्ती जाहीर केल्या. यामध्ये माजी राज्यमंत्री सतेज (बंटी) पाटील हे विधान परिषदेतील काँग्रेसचे नवे गटनेते असतील तर अमिन पटेल हे विधानसभेत पक्षाचे उपनेते असतील. तसेच माजी मंत्री अमित देशमुख हे विधानसभेतील काँग्रेसचे मुख्य प्रतोद, तर विश्वजित कदम यांची सचिवपदी नियुक्ती करण्यात आली आहे.
खान्देशातील आमदार शिरीष नाईक यांनाही मोठी जबाबदारी –
अखिल भारतीय काँग्रेसने विधानसभेतील काँग्रेसचे म्हणून खान्देशातील नंदुरबार जिल्ह्यातील नवापूर विधानसभा मतदारसंघाचे आमदार शिरीष नाईक यांची प्रतोद म्हणून नियुक्ती केली आहे. त्यांच्यासोबतच संजय मेश्राम हेसुद्धा प्रतोद म्हणून काम पाहतील. तसेच विधान परिषदेत अभिजित वंजारी हे काँग्रेसचे मुख्य प्रतोद, तर राजेश राठोड हे प्रतोद असतील.
काँग्रेसचे राष्ट्रीय अध्यक्ष मल्लिकार्जुन खरगे यांच्या आदेशानुसार या नियुक्ती करण्यात आल्या असल्याचे पक्षाचे राष्ट्रीय सरचिटणीस के. सी. वेणुगोपाल यांनी प्रसिद्धी पत्रकात म्हटले आहे. विधिमंडळाचे अर्थसंकल्पीय अधिवेशन आज 3 मार्चपासून सुरू होत असताना परवा शनिवारी या नियुक्ती करण्यात आल्या आहेत.
हेही वाचा – संतापजनक! केंद्रीय मंत्री रक्षा खडसेंच्या मुलीची छेडछाड, नेमकं काय घडलं, संपूर्ण घटनाक्रम..
