जळगाव, 10 मे: जळगाव जिल्ह्यात लाचखोरीच्या घटनांमध्ये सातत्याने वाढ होत असताना मोठी बातमी समोर आली आहे. लाचलुचपत प्रतिबंधक विभागाने बांधकाम विभागात काल शनिवार 9 मे रोजी मोठी कारवाई करत एका शाखा अभियंत्याला रंगेहाथ अटक केली. प्रलंबित बिल मंजूर करून देण्यासाठी 15 लाख रुपयांची लाच मागितल्याप्रकरणी तडजोडीनंतर 5 लाख रुपयांची रक्कम स्वीकारताना योगेश अभिमन्यू अहिरे या शाखा अभियंत्याला एसीबीच्या पथकाने रंगेहात पकडले. दरम्यान, या कारवाईमुळे शासकीय वर्तुळात एकच खळबळ उडाली आहे.
नेमकं प्रकरण काय? –
मिळालेल्या प्राथमिक माहितीनुसार, जळगाव जिल्ह्यातील एका नोंदणीकृत कंत्राटदाराने सार्वजनिक बांधकाम विभागांतर्गत विविध कामे पूर्ण केली होती. मात्र, त्या कामांचे लाखो रुपयांचे बिल प्रलंबित होते. संबंधित बिल मंजूर करण्यासाठी कंत्राटदाराने शाखा अभियंता योगेश अभिमन्यू अहिरे यांच्याशी संपर्क साधला असता, त्यांनी बिल मंजुरीसाठी तब्बल 15 लाख रुपयांच्या लाचेची मागणी केल्याचा आरोप आहे.
तक्रार दाखल झाल्यानंतर एसीबीने रचला सापळा –
लाच देण्याची इच्छा नसल्याने संबंधित कंत्राटदाराने थेट लाचलुचपत प्रतिबंधक विभागाकडे तक्रार दाखल केली. एसीबीच्या अधिकाऱ्यांनी अत्यंत गोपनीय पद्धतीने तक्रारीची पडताळणी केली असता, लाचेची मागणी झाल्याचे स्पष्ट झाले. त्यानंतर शनिवारी दुपारी सार्वजनिक बांधकाम विभागाच्या कार्यालय परिसरात सापळा रचण्यात आला.
अन् लाचप्रकरणी शाखा अभियांता एसीबीच्या जाळ्यात –
तडजोडीनुसार पहिल्या टप्प्यातील ५ लाख रुपयांची रोकड स्वीकारताना एसीबीच्या पथकाने झडप घालत शाखा अभियंता योगेश अहिरे यांना जागीच अटक केली. या कारवाईदरम्यान आरोपीच्या वापरातील निळ्या रंगाची बलेनो कार (क्रमांक MH-19-CV-2619) तपासासाठी जप्त करण्यात आली आहे. याप्रकरणी जिल्हापेठ पोलीस ठाण्यात गुन्हा दाखल करण्यात आला असून पुढील तपास सुरू आहे.
यांनी केली कारवाई –
लाचलुचपत प्रतिबंधक विभागाचे पोलीस उपअधीक्षक योगेश ठाकुर यांच्या मार्गदर्शनाखाली पोलीस निरीक्षक श्रीमती रेश्मा अवतारे (ला.प्र.वि., नंदुरबार कॅम्प जळगाव), पोलीस निरीक्षक हेमंत नागरे यांच्यासह पोलीस उपनिरीक्षक सुरेश पाटील, महिला पोलीस हवालदार संगीता पवार, पोलीस कॉन्स्टेबल बाळू मराठे, प्रदीप पोळ आणि भूषण पाटील यांनी ही कारवाई केली. दरम्यान, भ्रष्टाचारसंबंधी काही माहिती असल्यास अथवा लाच मागणाऱ्या लोकसेवकाबद्दल काही तक्रार असल्यास लाचलुचपत प्रतिबंधक विभाग, जळगाव यांच्याशी संपर्क साधण्याचे आवाहन पोलीस उपअधीक्षक योगेश ठाकुर यांनी केले आहे.
