पिंपळगाव (हरे.), 25 एप्रिल: विद्यार्थ्यांचे हित साधून संस्थेला प्रगतीच्या दिशेने नेण्याचे काम केले पाहिजे, असे प्रतिपादन आमदार किशोर आप्पा पाटील यांनी केले. ग्राम विकास मंडळ, पिंपळगाव (हरे) संचालित ग्राम विकास विद्यालय व कनिष्ठ महाविद्यालयाच्या नव्या इमारतीच्या बांधकामाचे भूमिपूजन त्यांच्या हस्ते काल २४ एप्रिल रोजी पार पडले. कै. हरिभाऊ गोविंदराव देशमुख सभागृहात आयोजित समारंभात आमदार पाटील बोलत होते.
आमदार किशोर आप्पा पुढे बोलताना म्हणाले की, संस्थेतील पदाधिकारी व शिक्षक अनेक अडचणींवर मात करत चांगले कार्य करत आहेत. त्यामुळे सर्वांनी त्यांच्या पाठीशी खंबीरपणे उभे राहणे आवश्यक आहे. आपल्या पूर्वजांनी उभारलेली ही संस्था विद्यार्थ्यांच्या हितासाठी असून तिला प्रगतीच्या दिशेने नेण्याची जबाबदारी सर्वांची आहे, असेही त्यांनी नमूद केले.
दरम्यान, संस्थेच्या विकासासाठी आवश्यक ती मदत करण्याचे आश्वासनही आमदार किशोर आप्पा पाटील यांनी दिले. या कार्यक्रमात माजी आमदार दिलीप वाघ, सहायक पोलीस निरीक्षक कल्याणी वर्मा, माजी जिल्हा परिषद सदस्य उद्धव मराठे आदींनी मनोगत व्यक्त केले. यावेळी आमदार किशोर आप्पा पाटील यांचा अमरावती लोकसभा संपर्कप्रमुखपदी नियुक्ती करण्यात आल्यानिमित्त सन्मान करण्यात आला.
याप्रसंगी माजी आमदार दिलीप वाघ, माजी जि.प.सदस्य मधूभाऊ काटे, उद्धव मराठे यांच्यासह ग्राम विकास मंडळाचे अध्यक्ष, उपाध्यक्ष व सर्व पदाधिकारी, स्थानिक सामाजिक व राजकीय क्षेत्रातील मान्यवर, तसेच विद्यालयाचे शिक्षक-शिक्षिका आणि विद्यार्थी मोठ्या संख्येने उपस्थित होते.
ग्राम विकास मंडळाच्या पदाधिकाऱ्यांसह मुख्याध्यापक, उपमुख्याध्यापक, पर्यवेक्षक, शिक्षक व शिक्षकेतर कर्मचारी यांनी कार्यक्रमाच्या यशस्वीतेसाठी परिश्रम घेतले. कार्यक्रमानंतर उपस्थितांसाठी स्नेहभोजनाचे आयोजन करण्यात आले होते.
