अहमदाबाद, 12 जून : गुजरातच्या अहमदाबादमध्ये विमान दुर्घटनेची धक्कादायक बातमी समोर आली आहे. अहमदाबादच्या मेघानीनगरमधील रहिवासी परिसरात 700 फूटांवरून खाली प्रवासी विमान कोसळले असून या विमानात दोन पायलटसह 10 क्रूमेंबर्स तसेच 232 प्रवासी असल्याचे समजते. टेक ऑफनंतर अवघ्या काही क्षणातच एका इमारतीवर हे विमान क्रॅश झाले. विमानाची जबाबदारी सुमित सबरवाल, फर्स्ट ऑफिसर क्लाईव्ह कुंदल यांच्याकडे होती अशी माहिती डीजीसीएकडून देण्यात आली आहे. दरम्यान, या घटनेत जीवितहानीबद्दल अद्याप अधिकृत माहिती समोर आलेली नाहीये.
नेमकं काय घडलं? –
मिळालेल्या माहितीनुसार, एअर इंडियाचे Boeing Dreamliner 171 विमानाने अहमदाबादहून लंडनसाठी उड्डाण केले होते. मात्र, दुपारी 1.38 वाजता केलेल्या उड्डाणानंतर अवघ्या काही मिनिटांतच हे विमान खाली कोसळले. या दुर्घटनेनंतर काही वेळातच 3 अग्निशमन गाड्या घटनास्थळी दाखल झाल्या आणि मोठ्या प्रमाणात कुलिंग ऑपरेशन राबविण्यात येत आहे. तसेच एनडीआरएफचे पथक आणि प्रशासनाकडून युद्धपातळीवर बचावकार्य सुरू करण्यात आले आहे असून विमानातील प्रवाशांची अधिकृत माहिती उपलब्ध झालेली नाही.
विमान प्रवासात गुजरातचे माजी मुख्यमंत्री –
गुजरातमधील अहमदाबाद इथे एअर इंडियाच्या विमानाचा भीषण अपघात झाला असून 700 फुटांवरुन मेघानीनगर ह्या नागरी वस्तीत हे विमान कोसळले. अहमदाबादध्ये कोसळलेल्या विमानातून गुजरातचे माजी मुख्यमंत्री विजय रुपाणी हे देखील प्रवास करत असल्याची माहिती समोर आली आहे.विमान दुर्घटनेनंतर गृहमंत्री अमित शाह यांनी गुजरातच्या मुख्यमंत्री भूपेंद्र पाटील यांना फोन करुन माहिती घेतली. तसेच सर्वोतोपरी मदतीचे आश्वासनही दिले.
दुर्घटनास्थळी मोठा स्फोट –
अहमदाबाद येथील विमान अपघाताचे व्हिडिओ सोशल मीडियात व्हायरल झाले आहेत. ज्याठिकाणी प्लेन क्रॅश झाले त्याठिकाणी धुराचे मोठे लोळ पसरल्याचे व्हिडिओतून दिसून येत आहे. तसेच घटनास्थळी विविध बचाव पथक दाखल झाले आहेत. मात्र, या दुर्घटनेत मोठी जिवितहानी झाल्याची शक्यता वर्तवण्यात येत असून अहमदाबादहून लंडनला म्हणजेच दूर मार्गावर जाणार असल्याने या विमानात इंधन देखील मोठ्या प्रमाणात भरण्यात आले होते, त्यामुळे अपघातानंतर दुर्घटनास्थळी मोठा स्फोट झाला. विमान अपघाताच्या कारणांबाबतही अद्याप स्पष्टता समोर आलेली नसून प्रशासन आणि आपत्कालीन यंत्रणा घटनास्थळी दाखल झाल्या आहेत. तसेच परिस्थिती नियंत्रणात आणण्याचे प्रयत्न सुरू आहेत.
हेही वाचा : जळगाव जिल्ह्यात वादळी वाऱ्यासह पाऊस; तिघांचा मृत्यू, 21 घरांचे नुकसान, पंचनामे सुरू
