पाचोरा, 27 मार्च: पाचोरा बसस्थानक परिसरात प्रवाशांना टार्गेट करून चोरी करणाऱ्या टोळीचा पर्दाफाश करण्यात पाचोरा पोलिसांच्या गुन्हे शाखेला यश आले आहे. विशेष म्हणजे, पकडण्यात आलेला एक आरोपी हा जिल्ह्यातून हद्दपार असलेला अट्टल गुन्हेगार असून त्याच्यासह एका विधीसंघर्ष बालकालाही ताब्यात घेण्यात आले आहे.
काय आहे संपुर्ण बातमी? –
मिळालेल्या माहितीनुसार, जळगाव जिल्ह्यात बसस्थानक परिसरात वाढत्या चोरीच्या घटनांच्या पार्श्वभूमीवर पोलीस अधीक्षक महेश्वर रेड्डी यांनी कठोर कारवाईचे निर्देश दिले होते. त्यानुसार, पाचोरा पोलीस स्टेशनचे पोलीस निरीक्षक राहुलकुमार पवार यांच्या मार्गदर्शनाखाली गुन्हे शाखेने विशेष मोहीम राबवली.
दरम्यान, २४ मार्च २०२६ रोजी सुभाष विठ्ठल भावसार (वय ७०, रा. उप्पलखेडा, ता. सोयगाव, जि. छत्रपती संभाजीनगर) यांनी पाचोरा कृषी उत्पन्न बाजार समितीत बाजरी विक्री करून मिळालेली 50 हजार रुपयांची रक्कम घेऊन बसस्थानकावरून गावी जाण्यासाठी बसमध्ये चढत असताना अज्ञात चोरट्यांनी चोरी केल्याची तक्रार नोंदवली होती. या प्रकरणी पाचोरा पोलीस ठाण्यात गुन्हा दाखल करण्यात आला होता.
गुन्ह्याचा तपास सुरू असताना गुन्हे शाखेला मिळालेल्या गोपनीय माहितीनुसार, अंकुश मधुकर सुरवाडे (वय १९, रा. गेंदालाल मिल, जळगाव) व त्याचा एक साथीदार विधीसंघर्ष बालक हे चोरीप्रकरणात सहभागी असल्याचे समोर आले. विशेष म्हणजे, सुरवाडे हा जिल्ह्यात विविध गुन्ह्यांमध्ये आरोपी असून त्याला दोन वर्षांसाठी जिल्ह्यातून हद्दपार करण्यात आलेले होते. माहितीच्या आधारे पोलिसांनी सापळा रचून दोन्ही आरोपींना पाचोरा बसस्थानक परिसरातून ताब्यात घेतले. चौकशीत त्यांनी चोरीची कबुली दिली असून या टोळीचा पुढील तपास सुरू आहे.
यांनी केली कारवाई –
ही कारवाई पोलीस अधीक्षक महेश्वर रेड्डी, अप्पर पोलीस अधीक्षक कविता नेरकर आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार, पोकॉ योगेश पाटील, पोकॉ संदीप राजपुत, पोकॉ हरीश परदेशी, पोकॉ, गणेश कुवर, होम. पंकज सोनवणे, होम. अमोल गायकवाड यांनी केली आहे. गुन्हयाचा पुढील तपास पोहेकॉ. राहुल शिंपी करत आहे.
