प्रयागराज (उत्तरप्रदेश) : उत्तरप्रदेशातील प्रयागराज येथील ऐतिहासिक महाकुंभमेळ्यात संगम घाटावर भीषण चेंगराचेंगरी झाल्याची घटना समोर आली आहे. मंगळवार-बुधवारी मध्यरात्री दीड वाजेच्या सुमारास प्रयागराजच्या संगम किनाऱ्यावर ही भीषण चेंगराचेंगरी झाली. यामध्ये 14 हून अधिक जणांचा मृत्यू झाला आहे. तसेच 50 हून अधिक जण जखमी झाले आहेत.
प्रयागराजमधील महाकुंभ मेळ्यात झालेल्या या चेंगराचेंगरीच्या घटनेनंतर प्रशासनाच्या विनंतीवरून सर्व 13 आखाड्यांनी आज मौनी अमावस्येचे अमृत स्नान रद्द केले आहे. याबाबत आखाडा परिषदेचे अध्यक्ष रवींद्र पुरी यांनी सांगितले की, संगम नाक्यावर जास्त गर्दी झाल्याने हा निर्णय घेण्यात आला आहे. पंतप्रधान नरेंद्र मोदी आणि गृहमंत्री अमित शहा यांनी उत्तरप्रदेशचे मुख्यमंत्री योगी आदित्यनाथ यांच्याकडून फोनवरून घटनेची माहिती घेतली.
दरम्यान, 14 मृतदेह शवविच्छेदानासाठी आणण्यात आले आहेत. मात्र, मृत किंवा जखमींची संख्या याबाबत प्रशासनाने कोणतीही माहिती दिलेली नाही.
एका अफवेमुळे संगम नाक्यावर चेंगराचेंगरी झाली, असे ग्राउंड झिरोवर उपस्थित काही पत्रकारांनी म्हटले आहे. यामध्ये काही महिला जमिनीवर पडल्या आणि लोकांनी त्यांच्यावर धाव घेतली. अपघातानंतर 70 हून अधिक रुग्णवाहिका संगम तीरावर पोहोचल्या. जखमी आणि मृतांना रुग्णालयात दाखल करण्यात आले.
आज महाकुंभात मौनी अमावस्येला स्नान आहे. त्यानिमित्त शहरात सुमारे कोट्यवधी भाविक उपस्थित राहण्याचा अंदाज आहे. मात्र, अपघातानंतर एनएसजी कमांडोंनी संगम तीराला घेराबंदी केली आणि संगम तीरावर सर्वसामान्यांना प्रवेश बंद करण्यात आला. याठिकाणी गर्दी आणखी वाढू नये म्हणून प्रयागराज शहरातही भाविकांच्या येण्यावर बंदी घालण्यात आली आहे. यासाठी शहराला लागून असलेल्या जिल्ह्यांमध्ये प्रशासनाला सतर्कतेचा इशारा देण्यात आला आहे.
वसंत पंचमीला आखाडे स्नान करणार –
दरम्यान, घडलेल्या घटनेने आम्हाला खूप दु:ख झाले आहे. हजारो भाविक आमच्यासोबत होते. त्यामुळे जनतेच्या हिताच्या दृष्टीने आखाडे आजच्या स्नानात सहभागी होणार नाहीत, असे आम्ही ठरवल्याचे अखिल भारतीय आखाडा परिषदेचे अध्यक्ष रवींद्र पुरी यांनी सांगितले. तसेच आजच्या ऐवजी वसंत पंचमीला स्नानासाठी यावे, असे आवाहनही त्यांनी केले.
