पाचोरा, 4 जुलै : जळगाव जिल्ह्यातील पाचोरा शहरातून एक धक्कादायक बातमी समोर आली आहे. पाचोरा शहरातील बसस्थानक परिसरात आज शुक्रवार 4 जुलै रोजी सायंकाळच्या सुमारास गोळीबाराची घटना घडली. या भयानक घटनेत एक तरूणाचा मृत्यू झाला. आकाश कैलास मोरे (वय – 32, रा. छत्रपती शिवाजीनगर, पाचोरा) असे मृत्यू झालेल्या तरूणाचे नाव आहे. या घटनेनंतर जळगाव जिल्हा पोलीस अधीक्षक डॉ. माहेश्वर रेड्डी यांनी घटनास्थळी धाव घेत महत्त्वाची माहिती दिली.
काय म्हणाले जळगाव जिल्हा पोलीस अधीक्षक डॉ. माहेश्वर रेड्डी –
माध्यमांशी बोलताना जळगाव जिल्हा पोलीस अधीक्षक डॉ. माहेश्वर रेड्डी म्हणाले की, आज सायंकाळी अंदाजे साडेसहा वाजता पाचोरा शहरात पाचोरा बसस्थानकाजवळ, गोळीबाराची घटना घडली. गोळीबाराच्या या घटनेत आकाश मोरे नावाचा इसम हा बसस्थानकाजवळ उभा होता. यावेळी अचानक निलेश सोनवणे हा पाठीमागून आला आणि या व्यक्तीने त्यांच्यावर अंधाधुंद गोळीबार केला. गोळीबाराच्या या घटनेनंतर आकाश मोरे या तरुणाला रुग्णालयात दाखल करण्यात आले. यावेळी त्यांना मृत घोषित करण्यात आले.
View this post on Instagram
आरोपी निलेश सोनवणे आणि त्याच्यासोबत असलेला आणखी एक अल्पवयीन सध्या फरार आहे. स्थानिक गुन्हे शाखा आणि पोलीस पथक आरोपींचा शोध घेत आहेत. लवकरात लवकर आरोपींना अटक केली जाईल. कोणत्या उद्देशाने हा गोळीबार करण्यात आला, दोन्ही आरोपींची काय पार्श्वभूमी आहे, याबाबत तपास सुरू आहे. तपासात सविस्तर माहिती मिळाल्यावर दिली जाईल, असे जळगाव जिल्हा पोलीस अधीक्षक डॉ. माहेश्वर रेड्डी यांनी माध्यमांना बोलताना सांगितले.
नेमकं काय घडलं? –
मिळालेल्या प्राथमिक माहितीनुसार, आकाश मोरे हा तरूण बसस्थानक परिसरात असताना त्याच्यावर अज्ञात व्यक्तींनी दहा-ते बारा राऊंड फायर करत गोळीबार केला. यामध्ये आकाश मोरे हा तरूण गंभीररित्या जखमी झाला आणि या गोळीबाराच्या घटनेत त्याचा मृत्यू झाला. आज शुक्रवारी सायंकाळच्या सुमारास ही घटना घडली.
पोलिसांकडून वेगाने तपास सुरू –
तसेच घटनेची माहिती मिळताच जळगाव जिल्हा पोलीस अधीक्षक डॉ. महेश्वर रेड्डी पाचोऱ्यात दाखल झाले. याप्रकरणी गोळीबार करणाऱ्या दोघांचा शोध घेतला जात असल्याचे पोलीस अधीक्षक डॉ. माहेश्वर रेड्डी यांनी सांगितले. दरम्यान, हा गोळीबार कशामुळे झाला याचा तपास पोलिसांकडून परिसरात असलेले सीसीटीव्ही फुटेज तपासून केला जातोय. पाचोरा बसस्थानक परिसरात झालेल्या गोळीबारात तरूणाच्या मृत्यूमुळे तालुक्यात खळबळ उडाली असून परिसरात भीतीचे वातावरण निर्माण झाले आहे.
