नवी दिल्ली/ मुंबई, 28 एप्रिल: राज्यातील लक्षवेधी ठरलेल्या विधानपरिषद निवडणुकांसाठी भारतीय जनता पक्ष आपल्या उमेदवारांची पहिली यादी जाहीर केली आहे. पक्षाच्या संसदीय समितीच्या मंजुरीनंतर महाराष्ट्रातील पाच विधानपरिषद जागांसाठी पाच उमेदवारांची घोषणा करण्यात आली असून, एका पोटनिवडणुकीसाठी स्वतंत्र उमेदवार जाहीर करण्यात आला आहे. अशा प्रकारे एकूण सहा उमेदवारांच्या नावांवर शिक्कामोर्तब झाले आहे.
भाजपने जाहीर केलेल्या यादीत प्रज्ञा सातव यांना पोटनिवडणुकीसाठी उमेदवारी देण्यात आली आहे. त्या यापूर्वी भारतीय राष्ट्रीय काँग्रेसमध्ये होत्या. याशिवाय विवेक कोल्हे, सुनिल कर्जतकर, माधवी नाईक, संजय भेंडे आणि प्रमोद जठार यांना विधानपरिषदेसाठी उमेदवारी जाहीर करण्यात आली आहे.
उत्तर महाराष्ट्रातून विवेक कोल्हेंना संधी –
अहिल्यानगर जिल्ह्यात प्रभाव असलेल्या कोल्हे कुटुंबातील विवेक कोल्हे यांना या वेळी संधी देण्यात आली आहे. ते ज्येष्ठ नेते शंकरराव कोल्हे यांचे नातू तर माजी आमदार स्नेहलता कोल्हे यांचे पुत्र आहेत.अहिल्यानगर जिल्ह्यातील कोपरगाव परिसरात काळे-कोल्हे असा पारंपरिक राजकीय संघर्ष पाहायला मिळतो.
मागील विधानसभा निवडणुकीत आशुतोष काळे यांना राष्ट्रवादी काँग्रेस पक्षकडून उमेदवारी मिळाल्यानंतर महायुतीचा समतोल राखण्यासाठी भाजपने कोल्हे यांना संयम बाळगण्याचे निर्देश दिले होते. आता मात्र पक्षाने त्यांना विधानपरिषदेत संधी देत राजकीय समीकरणांना नवे वळण दिले आहे.
विधान परिषदेच्या निवडणुकीचा ‘असा’ आहे संपूर्ण कार्यक्रम –
- निवडणुकीची अधिसूचना जारी करणे : 23 एप्रिल, 2026
- उमेदवारी अर्ज भरण्याचा शेवटचा दिवस: 30 एप्रिल 2026
- उमेदवारी अर्जांची छाननी: 2 मे 2026
- उमेदवारी अर्ज मागे घेण्याची अंतिम तारीख: 4 मे 2026
- मतदानाची तारीख: 12 मे 2026
- मतदानाची वेळ: सकाळी 9 वाजेपासून ते संध्याकाळी 4 वाजेपर्यंत आहे.
- मतमोजणी: 12 मे 2026 संध्याकाळी 5 वाजता
- निवडणूक प्रक्रिया पूर्ण करण्याची अंतिम तारीख: 13 मे 2026
