जळगाव- मुंबईतील सह्याद्री अतिथीगृह येथे आयोजित राज्यातील सर्व विमानतळाच्या बांधकाम प्रगतीच्या कामासंदर्भात आढावा बैठकीचे आयोजन करण्यात आले होते. या बैठकीत मुख्यमंत्री देवेंद्र फडणवीस यांनी जळगाव विमानतळासंदर्भात महत्त्वाच्या सूचना दिल्या.
काय म्हणाले मुख्यमंत्री देवेंद्र फडणवीस –
जळगाव येथील विमानतळावर नवीन टर्मिनल इमारत तयार करावेत, असे निर्देश मुख्यमंत्री देवेंद्र फडणवीस यांनी स्थानिक प्रशानसाला दिलेत. तसेच जळगाव विमातळावरच्या धावपट्टीवाढीसह अन्य पर्यायी उपाययोजनांना तातडीने हाती घेण्यात यावेत, अशा सूचनाही त्यांनी स्थानिक प्रशासनाला दिल्या. सह्याद्री अतिथीगृहावर काल आयोजित करण्यात आलेल्या या आढावा बैठकीला केंद्रीय सहकार आणि नागरी विमान वाहतूक राज्यमंत्री मुरलीधर मोहोळ उपस्थित होते. यावेळी मुख्यमंत्री देवेंद्र फडणवीस यांनी राज्यातील 11 विमानतळांचा आढावा घेतला.
विमान वाहतूक हे सर्वात वेगाने वाढणारे क्षेत्र –
विमान वाहतूक हे सर्वात वेगाने वाढणारे क्षेत्र आहे. केंद्र सरकार आणि राज्य शासनाला आवश्यक त्या पायाभूत सुविधा निर्माण करणे फार गरजेचे आहे. देश ५ ट्रिलीयन अर्थव्यवस्थेकडे वाटचाल करत असताना, हे क्षेत्र फार महत्त्वाचे आहे. महाराष्ट्र देशाचे ग्रोथ इंजिन म्हणून काम करत आहे. या क्षेत्रातील बारीक सारीक गोष्टीवर देश आणि राज्याला काम करावे लागणार आहे. या क्षेत्रातील वाढती संख्या विचारात घेऊन पायाभूत सुविधांचा विस्तार करावा लागणार आहे. सोलापूर आणि कोल्हापूर येथे नाईट लँडिंग होईल, असे नियोजन करण्याचे त्यांनी निर्देश दिले.
यावेळी नागरी विमान वाहतूक मंत्रालयाच्या सहसचिव रुबिना अली, असंगबा चुबा एओ, सहसंचालक नयोनिका दत्ता, जे. टी. राधाकृष्ण, प्रादेशिक कार्यकारी, भारतीय विमानतळ प्राधिकरण, पश्चिम क्षेत्राचे वरिष्ठ अधिकारी फैज अहमद किडवाई, सिडकोचे व्यवस्थापकीय संचालक विजय सिंघल, महाराष्ट्र औद्योगिक विकास महामंडळाचे मुख्य कार्यकारी अधिकारी पी. वेलरासू, नवी मुंबई आंतरराष्ट्रीय विमानतळाचे कार्यकारी अधिकारी, छत्रपती शिवाजी महाराज आंतरराष्ट्रीय विमानतळाचे कार्यकारी अधिकारी यांच्यासह मुख्यमंत्री सचिवालय तसेच विविध विभागांचे अतिरिक्त मुख्य सचिव, सचिव आदी उपस्थित होते.
VIDEO : आठवड्यात 6 जणांचा मृत्यू, जळगाव जिल्ह्यातील अपघात कधी थांबणार?, जिल्हाधिकारी Ayush Prasad Exclusive
