छत्रपती संभाजीनगर, 17 जानेवारी : राज्यभरात अपघातांच्या घटनेत वाढ होत असतानाचा छत्रपती संभाजीनगरातून धक्कादायक घटना समोर आली आहे. आईसोबत चॉकलेट आणण्यासाठी निघालेल्या एका चार वर्षीय मुलाचा शाळेच्या बसच्या अपघातात जागीच मृत्यू झाल्याची धक्कादायक घटना घडली आहे. शाहरुख पठाण (वय 4 वर्षे) असे मयत मुलाचे नाव आहे. दरम्यान, या घटनेनंतर संतप्त जमावाने बसची तोडफोड करत पेटवून दिली आहे.
काय संपूर्ण बातमी? –
मिळालेल्या माहितीनुसार, छत्रपती संभाजीनगर जिल्ह्यातील पैठण तालुक्यातील चितेगाव येथील पांगरा रोडवर चार वर्षांचा शाहरुख पठाण आपल्या आईचा बोट धरून किराणा दुकानात जात असताना त्याचवेळी तिथून जाणाऱ्या एका शाळेच्या बसने आई आणि मुलाला जोराची धडक दिली. ज्यात आई गंभीर जखमी झाली. मात्र, शाहरुख पठाण बसच्या चाकाखाली आल्याने त्याचा जागीच मृत्यू झाला. नागरिकांनी तात्काळ अपघातग्रस्त आई आणि मुलाला रुग्णालयात दाखल केले. दरम्यान, मुलाला डॉक्टरांनी मुलाला मयत घोषित केले.
जमावाने बस पेटवली –
बस अपघातात चिमुकल्याचा जागीच मृत्यू झाल्याच्या या घटनेनंतर संतप्त जमावाने बसची तोडफोड करत बस पेटवून दिली आहे. दरम्यान, घटनास्थळी नागरिकांची मोठ्या प्रमाणात गर्दी निर्माण झाली होती. दरम्यान, या घटनेची माहिती मिळताच घटनास्थळी पोलीस दाखल झाले आहे. तसेच अग्निशमक दलाला पाचारण करून पेटवून दिलेली बसची आग विजवण्यात आली आहे.
हेही वाचा : प्रांताधिकाऱ्यांवर जीवघेणा हल्ल्याप्रकरणी पाचोऱ्यातून तीन जणांना स्थानिक गुन्हे शाखेने केली अटक
