मुंबई, 17 जानेवारी : राज्यातील नागरिकांना जास्तीत जास्त शासकीय सेवा मोबाईलच्या माध्यमातून उपलब्ध झाल्या पाहिजेत. त्यासाठीची ऑनलाईन प्रणाली विकसित करण्याचे आदेश मुख्यमंत्री देवेंद्र फडणवीस यांनी गुरुवारी 16 जानेवारी रोजी राज्य मंत्रिमंडळाच्या बैठकीत बोलताना दिल्या. शासकीय सेवा ऑनलाइन देण्याचे काम येत्या 100 दिवसात पूर्ण करण्याचे आदेश मुख्यमंत्री फडणवीस यांनी दिले आहे.
मुख्यमंत्री देवेंद्र फडणवीसांचे आदेश –
राज्यातील विविध विभागांच्या 969 सेवा अधिसूचित करण्यात आल्या असून त्यापैकी आपले सरकार पोर्टलवर 536 सेवा उपलब्ध आहेत. तसेच 90 सेवा संबंधित विभागांच्या पोर्टलवर उपलब्ध आहेत. मात्र, सुमारे 343 सेवा ऑफलाइन पध्दतीने दिल्या जातात. अशातच या सर्वच सेवा आपले सरकार पोर्टलवर उपलब्ध करून द्याव्यात आणि ज्या सेवा सध्या ऑफलाइन पध्दतीने दिल्या जातात त्या सर्व ऑनलाइन करण्यासाठी माहिती तंत्रज्ञान विभागाने पुढाकार घ्यावा, असे आवाहन मुख्यमंत्री फडणवीस यांनी केले.
अनेक सेवा अधिसूचित करण्यात आलेल्या नसल्याने त्या सर्व सेवा अधिसूचित करण्यासाठी संबंधित मंत्री तसेच सचिवांनी पुढाकार घ्यावा. नागरिकांना सुमारे 99 टक्के इतक्या शासकीय सेवा मोबाइलच्या माध्यमातून उपलब्ध झाल्या पाहिजेत. आणि म्हणून नागरिकांना शासकीय कार्यालयात वारंवार जाण्याची आवश्यकता भासणार नाही, असेही मुख्यमंत्री फडणवीस यांनी सांगितले.
राज्यात आपण ईज ऑफ डूईंग बिझनेस या संकल्पनेवर काम करण्यावर भर देत आहोत. त्यानुसार अधिकारांचे विकेंद्रीकरण करण्यावर भर दिला गेला पाहिजे. क्षेत्रीय स्तरावरील अधिकार राज्य सरकारकडे केंद्रीत केले जाऊ नये, अशा स्पष्ट सूचना देखील मुख्यमंत्री देवेंद्र फडणवीस यांच्याकडून संबंधित विभागाच्या अधिकाऱ्यांना देण्यात आलेल्या आहेत.
हेही वाचा : आठव्या केंद्रीय वेतन आयोगाच्या स्थापनेला मंजुरी! किती असेल कमीत कमी पगार अन् पेन्शन किती वाढणार?
