पुणे, 25 जुलै : पुण्यात मुसळधार पावसामुळे अनेक रस्त्यांना नद्यांचं स्वरुप आलं आहे. अनेकांच्या घरात पाणी शिरले आहे. तर काही भागात जनजीवन देखील विस्कळीत झाल्याचे देखील पाहायला मिळत आहे. दरम्यान, लोकांना सुरक्षित ठिकाणी हलवण्यासाठी प्रशासन कामाला लागले असताना सर्वांनी फिल्डवर उतरा आणि वेळ पडल्यास नागरिकांना एअरलिफ्ट करा तसेच त्यांच्या खाण्यापिण्याची व्यवस्था करा, असे आदेश राज्याचे मुख्यमंत्री एकनाथ शिंदे यांनी दिले आहेत. (Pune Heavy Rain)
अजित पवार पुण्यात –
पुण्यात काल रात्रीपासून मुसळधार पाऊस होत आहे. या मुसळधार पावसामुळे अनेक भागांत पाणी साचलेले आहे. तसेच रस्त्यांवर पाणीच पाणी झाल्याने, रस्त्यांना नदीचे स्वरूप आले आहे. दरम्यान, स्थानिक नागरिकांचे जनजीवन विस्कळीत झाले आहे. दरम्यान, पुण्यातील पुरसदृश्य परिस्थितीवर कंट्रोलरूममधून लक्ष ठेवण्यासाठी राज्याचे उपमुख्यमंत्री अजित पवार पुण्यात दाखल झाले आहेत. दरम्यान, त्यांनी प्रशासनाला देखील महत्वाच्या सूचना केल्या आहेत.
शाळा-कार्यालयांना सुट्टी –
पुण्यात काल रात्रीपासून मुसळधार पाऊस होत आहे. दरम्यान, हवामान विभागाने येत्या काही तासांत पुणे शहर, भोर, वेल्हा, मावळ, मुळशी, हवेली तालुक्यातील खडकवासला परिसरात अतिमुसळधार पावसाचा इशारा दिला आहे. या पार्श्वभूमीवर आता या भागातील शाळा कार्यालयांना सुट्टी देण्यात आली आहे. तसेच पावसामुळे बारावीच्या फेरपरिक्षेला पोहचू न शकणाऱ्या विद्यार्थ्यांची पुन्हा परिक्षा घेण्यात येणार असल्याचे केंद्रीय राज्यमंत्री मुरलीधर मोहोळ यांनी सांगितले.
हेही वाचा : पुण्यात अतिमुसळधार पाऊस, पावसामुळे तीन जणांचा मृत्यू, जळगाव जिल्ह्याचा हवामान अंदाज नेमका काय?
