मुख्यमंत्री देवेंद्र फडणवीसांकडून अभिनंदन, कोण आहेत ‘पानिपत’कार विश्वास पाटील?

मुंबई, 15 सप्टेंबर : 99व्या अखिल भारतीय मराठी साहित्य संमेलनाच्या अध्यक्षपदी ज्येष्ठ साहित्यिक ‘पानिपत’कार विश्वास पाटील यांची निवड करण्यात आली. याबाबत मुख्यमंत्री देवेंद्र फडणवीस यांनी विश्वास पाटील यांचे अभिनंदन केले.

काय म्हणाले मुख्यमंत्री देवेंद्र फडणवीस –

‘साहित्य संमेलन म्हणजे अभिजात मराठीचा मानबिंदू‌. वैभवशाली मराठीच्या वाटचालीतील समृद्ध दालन. अशा या संमेलनाची शतकपूर्तीकडे वाटचाल सुरू आहे. या वाटचालीत सातारा येथे नियोजित 99व्या अखिल भारतीय मराठी साहित्य संमेलनाच्या अध्यक्षपदी ‘पानिपत’कार विश्वास पाटील यांची निवड ही यथार्थ अशीच आहे.

पाटील यांनी आपल्या दमदार लेखणीतून वैविध्यपूर्ण आणि कसदार साहित्यकृतीची निर्मिती केली आहे. यामुळे मराठी साहित्यात मोलाची भर घातली गेली आहे. त्यांच्या निवडीमुळे साहित्य संमेलन अध्यक्षांच्या आतापर्यंतच्या मालिकेचाही दिमाख वाढता असाच राहिला आहे. ही बाब मराठी साहित्य क्षेत्रातील होतकरूंसाठी प्रेरणादायी ठरणार आहे. या निवडीसाठी साहित्य महामंडळाशी निगडित सर्वांचे मनापासून अभिनंदन. ज्येष्ठ साहित्यिक विश्वास पाटील यांचे मनापासून अभिनंदन आणि 99व्या साहित्य संमेलनाचे यजमानपद मिळालेल्या सातारकरांना आयोजनासाठी हार्दिक शुभेच्छा, असेही मुख्यमंत्री देवेंद्र फडणवीस यांनी शुभेच्छा संदेशात म्हटले.

कोण आहेत विश्वास पाटील –

विश्वास पाटील हे मराठी साहित्यातील एक प्रसिद्ध नाव आहे. लोकप्रिय कादंबरीकार म्हणूनही त्यांची ओळख आहे. विश्वास पाटील यांनी आतापर्यंत ऐतिहासिक, सामाजिक व राजकीय विषयांवर आधारित अनेक प्रभावी कादंबऱ्या लिहिल्या आहेत. ‘पानिपत’ ही त्यांची सर्वाधिक गाजलेली ऐतिहासिक कादंबरी असून तिच्यातून त्यांनी आपल्या संपादकीय शैलीची एक आगळीवेगळी छाप मराठी वाचकांवर टाकली आहे. यासोबतच झाडाझडती, सिंहासन, चंद्रमुखी, महाड़, स्मरणगंध या त्यांच्या उल्लेखनीय अशा कादंबऱ्या आहेत.

दरम्यान, सातारा येथे होणारे हे 99 वे अखिल भारतीय साहित्य संमेलन 4 दिवस चालणार आहे. तसेच 1, 2, 3 आणि 4 जानेवारी रोजी हे संमेलन साताऱ्यातील शाहू स्टेडियम येथे होणार आहे. यामध्ये वाचकांना चारही दिवस ग्रंथ प्रदर्शनाचा लाभ घेता येणार आहे. तसेच निमंत्रितांची कोमलसंमेलन, संमेलनाच्या गाजलेल्या पुस्तकांचे प्रदर्शन, मान्यवर लेखकांच्या मुलाखती, कवी संमेलन, कादंबरी कार्यशाळा असे विविध दर्जेदार कार्यक्रम होणार आहेत.

या संमेलनासाठी प्रथमच अखिल भारतीय मराठी साहित्य संमेलनातील सर्व पदाधिकाऱ्यांना, संमेलन सन्मानप्राप्त लेखकांना, साहित्य अकादमी पुरस्कार प्राप्त निवडक लेखकांना तसेच साहित्य महामंडळाच्या माजी अध्यक्षांना निमंत्रित केले जाणार आहे.

बातमी शेअर करा !