मुंबई, 22 नोव्हेंबर : महाराष्ट्र राज्य माध्यमिक व उच्च माध्यमिक शिक्षण मंडळातर्फे (राज्य मंडळ) घेण्यात येणारी दहावी आणि बारावीच्या परिक्षेच्या तारखा जाहीर करण्यात आल्या आहेत. यामध्ये बारावीची लेखी परीक्षेस 11 फेब्रुवारी पासून तर दहावीच्या लेखी परीक्षेस 21 फेब्रुवारीपासून सुरुवात होणार आहे.
बारावीच्या परीक्षेचे वेळापत्रक –
महाराष्ट्र राज्य माध्यमिक व उच्च माध्यमिक शिक्षण मंडळातर्फे बारावीच्या परीक्षेचे वेळापत्रक जाहीर करण्यात आले असून 11 फेब्रुवारी बारावीच्या परीक्षेस सुरुवात होणार आहे. 11 फेब्रुवारी ते 18 मार्च 2025 असे हे वेळापत्रक असणार आहे. वेळापत्रकानुसार बारावीची प्रात्यक्षिक, अंतर्गत मूल्यमापन, तोंडी परीक्षा ते 10 फेब्रुवारी या कालावधीत होणार आहे.
दहावीच्या परीक्षेचे वेळापत्रक –
महाराष्ट्र राज्य माध्यमिक व उच्च माध्यमिक शिक्षण मंडळातर्फे दहावीच्या परीक्षेचे वेळापत्रक जाहीर करण्यात आले असून 21 फेब्रुवारीपासून दहावीच्या परीक्षेस सुरुवात होणार आहे. 21 फेब्रुवारी ते 17 मार्च 2025 या कालावधीत ही परीक्षा पार पडणार आहे. दहावीची प्रात्यक्षिक, अंतर्गत मूल्यमापन, तोंडी परीक्षा 3 ते 20 फेब्रुवारी या कालावधीत होणार आहे.
राज्य मंडळाने यंदा बारावी-दहावीच्या परीक्षा आठ ते दहा दिवस लवकर घेण्याच निर्णय घेतला असून परीक्षेचे विषयनिहाय सविस्तर वेळापत्रक राज्य मंडळाच्या अधिकृत संकेतस्थळावर प्रसिद्ध करण्यात आले आहे. परीक्षेपूर्वी शाळा, कनिष्ठ महाविद्यालयांकडे छापील स्वरूपात देण्यात येणारे वेळापत्रक अंतिम असणार आहे.
