सातारा, 25 फेब्रुवारी : मराठा आरक्षणाच्या पार्श्वभूमीवर मनोज जरांगे यांनी आज अंतरवाली येथे आयोजित केलेल्या निर्णायक बैठकीत उपमुख्यमंत्री देवेंद्र फडणवीस यांच्यावर गंभीर आरोप केले. दरम्यान, देवेंद्र फडणवीस यांच्या सागर बंगल्यावर येत असल्याचे सांगत मनोज जरांगे मुंबईच्या दिशेने रवाना झाले आहेत. दरम्यान, या सगळ्या घडामोडीनंतर देवेंद्र फडणवीस देखील साताोऱ्यातून मुंबईसाठी निघालेले आहेत.
देवेंद्र फडणवीस मुंबईकडे रवाना –
उपमुख्यमंत्री देवेंद्र फडणवीस आज सातारा दौऱ्यावरती होते. दरम्यान, जरांगे पाटील यांनी घेतलेल्या अत्यंत आक्रमक पवित्र्यानंतर देवेंद्र फडणवीस मुंबईकडे निघाले आहेत. मनोज जरांगे यांच्या आरोपांबाबत देवेंद्र फडणवीस यांना विचारले असता मी ऐकले नाही, मी पाहिले नाही तर मी कशाला उत्तर देऊ, अशी प्रतिक्रिया त्यांनी दिली.
जरांगे मुंबईकडे जाणाऱ्यावर ठाम –
गृहमंत्री देवेंद्र फडणवीस यांचा एकेरी उल्लेख करत गंभीर आरोप केले. “मराठ्यांनो एकजूट फुटू देऊ नका. मला त्याच्या दारात जाऊ द्या”, असे आवाहन जरांगे यांनी केले. “फडणवीस, मी सागर बंगल्यावर येतो मला गोळ्या घाला, माझा बळी घ्या, अशी आक्रमक भूमिका घेत मनोज जरांगे पाटील सागर बंगल्यावर जाण्यावर ठाम आहेत. मुंबईत जाण्यासाठी निघाले असता त्यांनी पत्रकारांसोबत संवाद साधला.
हेही वाचा : मोठी बातमी, मनोज जरांगे आक्रमक, उपमुख्यमंत्री फडणवीस यांच्यावर गंभीर आरोप करत मुंबईच्या दिशेने रवाना
