ईसा तडवी, प्रतिनिधी
पाचोरा, 8 मे : जळगाव लोकसभेच्या महायुतीच्या उमेदवार स्मिता वाघ यांच्या प्रचारासाठी पाचोरा येथे आज जाहीर सभेचे आयोजन करण्यात आले आहे. पाचोऱ्यातील भडगाव रोडवरील कैलामाता मंदिराच्या शेजारी असलेल्या अटल मैदानावर आज सकाळी 11 वाजता त्यांची जाहीरसभा पार पडणार आहे.
ठाकरेंना कसे प्रत्युत्तर देणार? –
जळगाव जिल्ह्यात 13 मे रोजी मतदान प्रक्रिया पार पडणार आहे. या पार्श्वभूमीवर उमेदवारांच्या प्रचारासाठी महाविकास आघाडी व महायुतीकडून राज्यातील मोठ्या नेत्यांच्या सभांचे आयोजन करण्यात येत आहे. कालच, जळगावात शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांच्या सभेचे आयोजन करण्यात आले. दरम्यान, या सभेत उद्धव ठाकरे यांनी भाजपसह पंतप्रधान नरेंद्र मोदी यांच्यावर जोरदार टीका केली. यावरून देवेंद्र फडणवीस ठाकरेंना नेमके कसे प्रत्युत्तर देणार, याकडे सर्वांचे लक्ष लागले आहे.
