मुंबई, 26 एप्रिल : राज्यात महायुतीला प्रचंड मोठ्या प्रमाणात बहुमत मिळालं. यानंतर शिंदेंच्या शिवसेनेचे प्रमुख एकनाथ शिंदे हे देखील मुख्यमंत्रीपदासाठी आग्रही होते. मात्र, भाजपच्या जागा जास्त असल्यानं देवेंद्र फडणवीस यांच्या गळ्यात मुख्यमंत्रीपदाची माळ पडली. यावरून झालेल्या नाराजीनाट्याची काही काळ बरीच चर्चा होती. मात्र, आता पुन्हा एकदा भाजपचे नेते तथा महायुती सरकारमधील कॅबीनेट मंत्री चंद्रशेखर बावनकुळे यांनी देवेंद्र फडणवीसांच्या मुख्यमंत्री पदाबाबत केलेल्या वक्तव्यांमुळे राजकीय वातावरण तापलंय.
मंत्री चंद्रशेखर बावनकुळे काय म्हणाले? –
मंत्री चंद्रशेखर बावनकुळे एका कार्यक्रमात बोलताना म्हणाले की, विकसीत महाराष्ट्र हा फडणवीस यांचा संकल्प आहे. फडणवीस मुख्यमंत्री असल्याशिवाय विकसित महाराष्ट्राचा संकल्प पूर्ण होऊ शकत नाही. फडणवीस यांच्या नेतृत्वातच आपल्याला पुढे जायचे आहे. केंद्रात पंतप्रधान नरेंद्र मोदी आणि राज्यात देवेंद्र फडणवीस यांचे डबल इंजिन सरकारच राज्याचा विकास, भले करू शकतात. यामुळे 2034 पर्यंत फडणवीस हेच मुख्यमंत्री असतील.
View this post on Instagram
एकनाथ शिंदेंची प्रतिक्रिया नेमकी काय? –
राज्याचे उपमुख्यमंत्री एकनाथ शिंदे यांनी काल मुंबईत माध्यमांसोबत संवाद साधला. यावेळी मंत्री चंद्रशेखर बावनकुळे यांच्या वक्तव्यावर पत्रकारांनी प्रतिक्रिया विचारली असता एकनाथ शिंदे यांनी दोन्ही हात जोडत ‘शुभेच्छा’ अशी एका शब्दात प्रतिक्रिया दिली.
हेही वाचा : UPSC मध्ये देशात पहिली आलेल्या शक्ती दुबेने केलं मराठमोळ्या बिरदेवचं कौतुक; म्हणाली, ‘त्याचं हे यश…’
