नंदुरबार : उपमुख्यमंत्री एकनाथ शिंदे हे येत्या 31 मार्च रोजी नंदुरबार जिल्ह्याच्या दौऱ्यावर येणार होते. नंदुरबार जिल्ह्यातील अक्कलकुवा येथे उपमुख्यमंत्री एकनाथ शिंदे यांच्या जाहीर सभेचे आयोजन करण्यात आले होते. मात्र, उपमुख्यमंत्री एकनाथ शिंदे यांचा हा नंदुरबार जिल्हा दौरा रद्द झाल्याची माहिती विधानपरिषदेचे आमदार चंद्रकांत रघुवंशी यांनी दिली.
काय म्हणाले आमदार चंद्रकांत रघुवंशी –
याबाबत माहिती देताना विधानपरिषदेचे आमदार चंद्रकांत रघुवंशी म्हणाले की, उपमुख्यमंत्री एकनाथ शिंदे यांची नंदुरबार जिल्ह्यातील अक्कलकुवा याठिकाणी 31 मार्च रोजी दुपारी 1 वाजता सभा होणार होती. मात्र, भारताच्या राष्ट्रपती महामहिम द्रौपदी मुर्मू यांचा 31 मार्च रोजी महाराष्ट्र राज्याचा दौरा जाहीर झाला आहे. त्यामुळे उपमुख्यमंत्री एकनाथ शिंदे यांचा नंदुरबार जिल्हा दौरा हा रद्द झाला आहे, अशी माहिती आमदार चंद्रकांत रघुवंशी यांनी दिली. तसेच याबाबत पुढची तारीख कळवण्यात येईल. 15 तारखेच्या जवळपास तो दौरा निश्चित होईल, असेही त्यांनी सांगितले.
आमश्या पाडवी यांना अक्कलकुवा मतदारसंघातून निवडून द्या, मी चंद्रकांत रघुवंशी यांना विधानपरिषद आमदार बनवेन, असे आश्वासन उपमुख्यमंत्री तथा शिवसेना पक्षप्रमुख एकनाथ शिंदे यांनी मतदारसंघाच्या जनतेला दिले होते. अखेर विधानसभा निवडणुकीत अक्कलकुवा मतदारसंघातून आमश्या पाडवी यांनी विजय मिळवला. यानंतर त्यांची विधानपरिषदेची जागा रिक्त झाली होती. त्यामुळे एकनाथ शिंदे यांनी दिलेला शब्द पाळत शिंदे गटाचे नेते चंद्रकांत रघुवंशी यांना विधानपरिषदेची आमदारकी दिली.
यानंतर आता अक्कलकुवा येथे सोमवारी 31 मार्च रोजी खान्देशातील नंदुरबार जिल्ह्यातील अक्कलकुवा येथे एकनाथ शिंदे यांच्या जाहीर सभेचे आयोजन करण्यात आले होते. नंदुरबार जिल्ह्याच्या जनतेचे आभार मानण्यासाठी उपमुख्यमंत्री एकनाथ शिंदे येणार होते. मात्र, त्यांचा हा दौरा रद्द झाला असून याबाबत पुढची तारीख कळवण्यात येईल. 15 तारखेच्या जवळपास तो दौरा निश्चित होईल, असे आमदार चंद्रकांत रघुवंशी यांनी सांगितले.
