धुळे, 12 फेब्रुवारी : सासऱ्याने केलेले अतिक्रमण सरपंच सुनेला भोवले असून अपात्रतेची कारवाई करण्यात आली आहे. शिंदखेडा तालुक्यातील साळवे ग्रामपंचायतीच्या लोकनियुक्त महिला सरपंचावर ही कारवाई करण्यात आली आहे. उषाबाई संतोष वाघ यांचे सरपंचपद जिल्हाधिकारी जितेंद्र पापळकर यांनी अपात्र ठरविले आहे. या निकालाकडे तालुक्यातील सर्वांचे लक्ष लागून होते. अशातच अपात्रतेची कारवाई करण्यात आल्याने राजकीय गोटात खळबळ उडाली आहे.
काय आहे संपुर्ण बातमी? –
शिंदखेडा तालुक्यातील साळवे येथील ग्रामपंचायतीची नोव्हेंबर 2023 मध्ये निवडणूक घेण्यात आली होती. या निवडणुकीत उषाबाई संतोष वाघ ह्या लोकनियुक्त सरपंच म्हणून निवडून आल्या होत्या. दरम्यान, त्यावेळी उषाबाई संतोष वाघ यांच्या हिंदू एकत्र कुटुंबातील त्यांचे सासरे भगवान दीपा वाघ यांच्या नावे असलेली घर मिळकत ही अतिक्रमित असल्याने महाराष्ट्र ग्रामपंचायत अधिनियम 1959 चे कलम 14 (ज-3) अन्वये सरपंच उषाबाई वाघ यांना लोकनियुक्त पदावर राहून कामकाज करण्यास अपात्र ठरविण्यात आले आहे.
..अन् जिल्हाधिकाऱ्यांनी ठरविले अपात्र –
साळवे येथील रमेश खंडेराव शिंदे यांनी जिल्हाधिकारी जितेंद्र पापळकर यांच्याकडे 2024 मध्ये तक्रारी विवाद अर्ज दाखल केला होता. त्यावर सुनावणी झाल्यानंतर शिंदखेडा गटविकास अधिकारी यांच्यावतीने वाद मिळकतीची मोजणी होऊन तसेच प्रशासकीय स्तरावरून सखोल चौकशी करण्यात आली होती.
दरम्यान, गुरुवारी 6 फेब्रुवारी रोजी जिल्हाधिकारी जितेंद्र पापळकर यांनी अर्जदार रमेश शिंदे यांचा अर्ज मान्य करीत लोकनियुक्त सरपंच उषाबाई संतोष वाघ यांना सरपंच म्हणून उर्वरित कालावधीसाठी अपात्र घोषित केले आहे. अर्जदाराचे वकील म्हणून अॅड. चेतन पाटील आणि अॅड. किरण कुमावत यांनी कामकाज पाहिले.
हेही पाहा : IPS Dr. Maheshwar Reddy: सोशल मीडिया, क्राइम, तरुणाई; Jalgaon SP डॉ. महेश्वर रेड्डींची विशेष मुलाखत
