जळगाव : गेल्या काही दिवसात पुणे, नागपूरमध्ये जीबीएस या रुग्णांची संख्या मोठ्या प्रमाणात आढळून आली आहे. यामुळे काही रुग्णांचा मृत्यूही झाला आहे. यातच आता जळगावमध्ये जीबीएस आजाराची पहिली महिला रुग्ण आढळून आली आहे. 45 वर्षीय या महिलेवर शासकीय वैद्यकीय महाविद्यालय आणि रुग्णालयात आयसीयू कक्षात उपचार सुरू आहेत. सध्या या महिलेची प्रकृती स्थिर आहे.
शासकीय वैद्यकीय महाविद्यालय आणि रुग्णालयातील औषध व वैद्यकशास्त्र विभागाचे प्रमुख डॉ. पाराजी बाचेवार हे या जीबीएस रुग्ण महिलेवर उपचार करत आहेत. त्यांनी दिलेल्या माहितीनुसार, 4 दिवसांपूर्वी या महिलेच्या पायात थकवा जाणवत होता. त्यानंतर तिला उलट्या आणि जुलाबचा त्रास सुरू झाला.
दरम्यान, गुरुवारी या महिलेला शासकीय वैद्यकीय महाविद्यालय रुग्णालयात दाखल करण्यात आले. यानंतर याठिकाणी या महिलेचे एमआरआय, रक्त तसेच मेंदूतील पाण्याची तपासणी करण्यात आली. दरम्यान, काल शुक्रवारी दुपारी त्याचा अहवाल प्राप्त झाला. यामध्ये यामहिलेला जीबीएस या आजाराची लागण झाल्याचे निदान झाले.
तर हा आजार गंभीर नसून एक लाख लोकांमधून तो एक ते दोन जणांना झाल्याचे आढळून येत आहे. पुणे, नागपूरनंतर आता जळगावात या आजाराचा रुग्ण आढळून आला आहे.
या आजाराची लक्षणे –
या आजारात स्वत:ची रोग प्रतिकारक शक्ती स्वत:लाच मारते. पायापासून थकवा जाणवायला लागला की सुरुवात होऊ शकते. त्यानंतर पायाला मुंग्या येणे, नंतर हाताला मुंग्या येतात. तसेच श्वास घेण्यास अडचण येते ही या आजाराची लक्षणे आहेत.
काय काळजी घ्यावी –
शिळे अन्न आणि दूषित पाण्यापासून या आजाराची लागण होत असल्याचे निष्पन्न झाले आहे. तसेच त्यामुळे या बाबी प्रकर्षाने टाळाव्यात असा सल्ला डॉक्टरांनी दिला आहे.
हेही वाचा – Pachora News : पाचोऱ्यातील ‘त्या’ 3500 अतिक्रमित घरांची नियमानुकूल करून नावावर लावण्याबाबतची कार्यवाही सुरू
