जळगाव, 22 मे: जळगाव येथील उपनिबंधक, सहकारी संस्था कार्यालयातील उपनिबंधक जगदीश बाबुराव बारी याच्या विरोधात लाचलुचपत प्रतिबंधक विभागाने (ACB) केलेल्या कारवाईत मोठा मुद्देमाल उघडकीस आला आहे. कॉसमॉस बँक, भुसावळ येथील लॉकरची पंचांसमक्ष झडती घेतली असता तब्बल १ कोटी ७ लाख ४४ हजार ७५ रुपयांचे सोन्या-चांदीचे दागिने आणि रोख रक्कम जप्त करण्यात आली आहे.
नेमकी बातमी काय? –
लाचलुचपत प्रतिबंधक विभागाने २० मे २०२६ रोजी जगदीश बारी यांच्यावर यशस्वी सापळा कारवाई केली होती. त्यानंतर जिल्हापेठ पोलीस ठाण्यात भ्रष्टाचार प्रतिबंध अधिनियमाच्या कलम ७ व १२ अन्वये गुन्हा दाखल करण्यात आला आहे. या प्रकरणात आरोपीला अटक करण्यात आली असून न्यायालयाने २३ मे २०२६ पर्यंत पोलीस कोठडी सुनावली आहे.
दरम्यान, घर झडतीदरम्यान बारी यांचे कॉसमॉस बँकेत लॉकर असल्याची माहिती मिळाल्यानंतर त्याची तपासणी करण्यात आली. या झडतीत ६६०.३३० ग्रॅम वजनाचे सोन्याचे हार, बांगड्या आणि सोन्याचे बिस्किट असा ९९ लाख ४ हजार ९६० रुपयांचा ऐवज आढळून आला. तसेच ८ लाख ३६ हजार ५०० रुपयांची रोख रक्कम, ज्यामध्ये सर्व ५०० रुपयांच्या नोटा होत्या, तीही जप्त करण्यात आली. याशिवाय १०.५०० ग्रॅम वजनाचे २ हजार ६२५ रुपयांचे चांदीचे दागिने मिळून आले.
लॉकरमधून जप्त करण्यात आलेल्या एकूण मुद्देमालाची किंमत १ कोटी ७ लाख ४४ हजार ७५ रुपये इतकी असल्याचे ACB ने स्पष्ट केले आहे. या प्रकरणी जिल्हा पेठ पोलिस स्टेशनमध्ये गुन्हा दाखल करण्यात आला असून पुढील तपास सुरू आहे.
यांनी केली कारवाई –
या कारवाईदरम्यान लॉकर झडती पथकात पोलीस पोलीस उपअधीक्षक योगेश ठाकूर, पोलीस निरीक्षक स्मिता नवघरे यांच्यासह पोउनि सुरेश पाटील, महिला पोलीस हवालदार संगिता पवार, पोलीस अंमलदार प्रदीप पोळ, मनोज पाटील, अमोल सुर्यवंशी आणि चंद्रशेखर चौधरी यांनी सहभाग घेतला. सर्व अधिकारी व कर्मचारी लाचलुचपत प्रतिबंधक विभाग, जळगाव येथे कार्यरत आहेत.
हेही वाचा: राज्यस्तरीय खरीप हंगाम आढावा बैठक संपन्न; कृषी क्षेत्रातील डिजिटायझेशनवर विशेष भर
