चंद्रकांत दुसाने, विशेष प्रतिनिधी
पाचोरा, 29 जुलै : पाचोरा-भडगाव विधानसभा मतदारसंघाचे आमदार किशोर पाटील यांच्या हस्ते आज नगरपरिषदेच्या फायर फायटींग बाईकचे लोकार्पण करण्यात आले. आग प्रतिरोधक अत्याधुनिक यंत्रणांनी सज्ज असलेल्या अशा या बाईक आहेत. यावेळी पाचोरा नगरपरिदेचे मुख्याधिकारी मंगेश देवरे, गणेश भीमराव पाटील, माजी नगराध्यक्ष संजय गोहिल तसेच नगरपरिषदेतील व अग्निशमन दलातील कर्मचारी उपस्थित होते.
पाचोरा येथे फायर फायटींग बाईकचे लोकार्पण –
महाराष्ट्र शासनाच्या आपत्ती व्यवस्थापन, मदत व पुनर्वसन विभागामार्फत जळगाव जिल्ह्यातील सर्व नगरपालिकांच्या अग्निशमन विभागास फायर फायटींग बाईकचे वितरण करण्यात आले होते. यापैकी पाचोरा नगरपरिषदेला 2 फायर फायटींग बाईक मिळाल्या आहेत. दरम्यान, या फायर फायटींग बुलेटचे आमदार किशोर पाटील यांच्या हस्ते आज लोकार्पण करण्यात आले.
फायर फायटींग बाईकचे वैशिष्ट्ये आणि महत्व –
- फायर फायटिंग बाईकमुळे आग फार कमी वेळात विझवता येते.
- फायर फायटिंग बाईक एक किंवा दोन व्यक्ती हाताळू शकतात.
- कार्यालये, शाळा इत्यादी सार्वजनिक इमारतीत याचा प्रभावीपणे उपयोग करता येईल.
- फायर फायटिंग बाईकच्या वापरामुळे आगीच्या ठिकाणी पाण्यामुळे होणारे नुकसान कमी करणे सहज शक्य.
- कर्मचा-यांना किमान प्रशिक्षण दिल्यास अग्निशमन दल घटनास्थळी येईपर्यंत आग आटोक्यात येऊ शकते किंवा विझूही शकते.
- प्राथमिक स्वरुपाच्या किंवा मध्यम स्वरुपाच्या आगीवर प्रभावीपणे वापरण्यासाठी बाईकचा उपयोग.
- कमीत कमी पाण्याचा वापर हा पाण्याच्या सुक्ष्म कणांच्या (Water Mist) रुपाने आगीवर केला जातो.
- आगीची उष्णता ही पाण्याचे बाष्पीकरण करण्यासाठी होवून आग थंड करण्याची प्रक्रिया जलद गतीने होते.
- पाण्याचे बाष्पीभवन झाल्याने आगीच्या सभोवताली असलेल्या प्राणवायुचा (Oxygen) पुरवठा कमी होवून आग विझविण्यास मदत.
- ‘बाईक माऊंटेड मिस्ट टेक्नॉलॉजी’ गर्दीच्या भागात प्रथम प्रतिसाद देणारे म्हणून ऑपरेशन सुलभ करणारे ठरणार.
- ‘वॉटरमिस्ट आणि सीएएफ बाइक माउंटेड फायर एक्टिंग्विशर’ ही सर्वात आधुनिक आणि कॉम्पॅक्ट फायर कॉम्बॅट सिस्टीम असल्याने महत्त्वाच्या ठिकाणी होणारे मोठे नुकसान टाळता येते.
