ईसा तडवी, प्रतिनिधी
पाचोरा, 3 फेब्रुवारी : जळगाव जिल्ह्यात लाचखोरीच्या घटनांमध्ये वाढ होत असताना पाचोरा तालुक्यातून लाचप्रकरणाची बातमी समोर आली आहे. नांगर व रोटर खरेदीसाठीचे अनुदान मंजूर करून देण्याच्या मोबदल्यात पाच हजार रुपयांची लाच स्वीकारताना पाचोरा येथील कृषी उपअधिकारी लिलाधर शिवाजीराव देशमुख याच्यासह त्याचा पंटर आणि आणखी एका व्यक्तीला अटक करण्यात आली. ही कारवाई सोमवारी दुपारी करण्यात आली. या प्रकरणात संजय प्रभाकर पाटील व नितीन इंदलसिंग निकम (रा. आंबेवडगाव, ता. पाचोरा) अशी अटक करण्यात आलेल्या इतर दोघांची नावे आहेत.
नेमकं प्रकरण काय? –
मिळालेल्या प्राथमिक माहितीनुसार, मुळ तक्रारदार हे पाचोरा तालुक्यातील जोगेवडगाव येथील असून ते परिवारासह गावात राहतात. तक्रारदार यांनी शासन योजनेअंतर्गत शेती व्यवसायासाठी लागणारे साहित्य खरेदी करण्यासाठी कृषी विभागामार्फत सबसीडी मिळत असल्याने त्यांनी नांगर व रोटर खरेदी करून सबसीडी मिळण्यासाठी पाचोरा कृषी कार्यालयाकडे ऑनलाईन पध्दतीने अर्ज केला होता.
शेतकऱ्याकडे मागितली लाच –
सदर कार्यालयाकडुन नमुद साहित्य खरेदी करण्यासाठी मंजुरी मिळाल्याने त्यांनी नांगर व रोटर खरेदी केले होते. सदर खरेदी केलेल्या साहित्याचा कृषी उप अधिकारी, कृषी कार्यालय, पाचोरा विभाग, जळगाव यांचेसोबत फोटो काढुन ते योजनेच्या वेबसाईटवर ऑनलाईन अपलोड करून अनुदान मिळवुन देण्यासाठी लिलाधर देशमुख, कृषी उप अधिकारी, पाचोरा यांनी तक्रारदार यांचेकडे ६,०००/- रूपये लाच मागणी करून नमुद लाच रक्कम ही संजय पाटील, धनदाई कृषी केंद्र, आंबेवडगाव यांचेकडे देणेबाबत सांगितले होते.
दरम्यान, त्याबाबत तक्रारदार यांनी त्यांचे विरूध्द आज दि.०२/०२/२०२६ रोजी लाप्रवि जळगाव घटकाकडे तक्रार दिली होती. तक्रारदार यांनी दिलेल्या तक्रारीची आज दि.०२/०२/२०२६ रोजी पंचांचे समक्ष पडताळणी केली असता लिलाधर देशमुख यांनी कामाचे फोटो काढुन ते योजनेच्या वेबसाईटवर ऑनलाईन अपलोड करून अनुदान मिळवुन देण्यासाठी यांनी तक्रारदार यांचेकडे पंचासमक्ष ६,०००/- रूपये लाच मागणी करून तडजोड अंती ५,०००/- स्विकारण्याचे मान्य करून ते खाजगी पंटर संजय पाटील, धनदाई कृषी केंद्र, आंबेवडगाव यांचेकडे देण्यास सांगितले.
दरम्यान, लिलाधर देशमुख यांनी सांगितल्याप्रमाणे तक्रारदार हे सदर लाच रक्कम संजय पाटील यांना देण्यासाठी त्यांचे धनदाई कृषी केंद्र, आंबेवडगाव येथे गेले असता ते दुकानावर नसल्याने आलोसे देशमुख यांचे सांगणे प्रमाणे सदर लाच रक्कम ही दुकानावर हजर असलेले नितीन निकम यांना सदरची रक्कम लाचेची असल्याचे जाणीव असतांनाही त्यांनी लाचेची रक्कम पंचासमक्ष स्विकारली. यामुळे या लाचप्रकरणात लिलाधर देशमुख, आरोपी खाजगी इसम संजय पाटील व नितीन निकम यांचेविरूध्द पिंपळगाव हरेश्वर पोलीस स्टेशन येथे गुन्हा दाखल करण्यात आला आहे.
यांनी केली कारवाई –
सदरची कारवाई पर्यवेक्षण अधिकारी जळगाव लाचलुचपत प्रतिबंधक विभागाचे पोलीस उपअधीक्षक योगेश ठाकूर, सापळा अधिकारी पोलीस निरीक्षक रेश्मा अवतारे, सापळा पथकातील पोलीस निरीक्षक हेमंत नागरे, उपनिरीक्षक दिनेशसिंग पाटील, सुरेश पाटील, प्रदीप पोळ, राकेश दुसाने यांनी यशस्वी केली.
हेही वाचा : जळगाव जिल्हा नियोजन समितीच्या बैठकीत तब्बल ‘इतक्या’ कोटींच्या प्रारूप आराखड्यास मंजुरी
