पारोळा, 3 जुलै : जळगाव जिल्ह्यात लाचखोरीच्या घटनांमध्ये वाढ होत असताना लाचलुचपत विभागाने पारोळ्यात लाचप्रकरणी मोठी कारवाई केलीय. सागाची झाडे तोडण्याच्या परवानगीसाठी 8 हजार रूपयांची लाच घेतल्याप्रकरणी दोन वनपालांना काल बुधवार 2 जुलै रोजी रंगेहात पकडले. यामध्ये एका महिला वनपालाचा देखील समावेश आहे. दिलीप भाईदास पाटील (वय 52, रा. मोंढाळा ता. पारोळा) आणि वैशाली ज्ञानेश्वर गायकवाड (वय 38 रा. चोरवड ता. पारोळा) अशी लाच घेणाऱ्यांची नावे आहेत.
नेमकं प्रकरण काय? –
मिळालेल्या माहितीनुसार, तक्रारदार हे शेतात लागवड केलेल्या सागाच्या झाडांची शेतमालकाकडून खरेदी करण्याचा व्यापार करतात. तक्रारदार यांनी पारोळा तालुक्यातील इंधवे शेतकऱ्यांच्या शेतात असलेल्या सागाचे झाडे तोडण्याचा शेतकरी व तक्रारदार यांच्यात साठ हजार रुपयांचा सौदा झालेला होता. त्यानुसार सदर शेतकरी यांनी उपवन विभाग पारोळा येथून सागाची झाडे तोडण्याची परवानगी मिळण्यासाठी सदर शेतकऱ्यांनी तक्रारदार यांना अधिकार पत्र दिले होते.
सागाची झाडे तोडण्याच्या परवानगीसाठी लाचेची मागणी –
त्यानुसार सागाची झाडे तोडण्याची परवानगी देण्यासाठी वनपाल दिलीप भाईदास पाटील यांनी तक्रारदाराकडे आठ हजार रुपयांची लाचेची मागणी केली. याप्रकरणी जळगाव लाचलुचपत विभागाकडे 19 जून रोजी तक्रार प्राप्त झाली होती. त्याप्रमाणे दिनांक 19 जून रोजी पडताळणी केली असता वनपाल दिलीप भाईदास पाटील यांनी 8000 ची मागणी करुन लाच स्वीकारण्याची तयारी दर्शविली.
एसीबीने पकडले रंगेहात –
दरम्यान, जळगाव लाचलुचपत विभागाने सापळा रचत काल बुधावारी दुपारी चार वाजेच्या सुमारास तक्रारदार यांच्याकडून वनपाल दिलीप भाईदास पाटील यांच्या सांगण्यावरून महिला वनपाल वैशाली ज्ञानेश्वर गायकवाड यांनी पंचासमक्ष 8000/-रुपये स्वीकारताना रंगेहात सापडले. याप्रकरणी दोघं वनपालांना ताब्यात घेण्यात आले असून मोबाईल जप्त करण्यात आले. तसेच महिला वनपाल वैशाली गायकवाड यांना नोटीस देऊन सोडण्यात आले आहे.
एसबीच्या पथकाने केली कारवाई –
याप्रकरणी पारोळा पोलीस स्टेशन येथे भ्रष्टाचार प्रतिबंधक अधिनियम प्र अधि . 1988 अन्वये गुन्हा दाखल करण्यात आला आहे. पोलीस उपअधीक्षक योगेश ठाकूर यांच्या आदेशानुसार सफौ. सुरेश पाटील, मपोहेकॉ. शैला धनगर, पोहेकॉ. किशोर महाजन, पोकॉ राकेश दुसाने, पोकॉ अमोल सूर्यवंशी यांच्या पथकाने ही कारवाई केलीय.
