जळगाव : जळगाव विमानतळाची धावपट्टी पूर्णतः विकसित करण्यासाठी नशिराबाद ते उमाळे हा रस्ता बंद करून पर्यायी मार्ग म्हणून प्रमुख जिल्हा मार्ग 109 चा वापर करण्यासाठी बांधकामास मान्यता देण्यात आली असून यासाठी 6 कोटी 60 लाख रुपयांची मान्यता देण्यात आली आहे.
काय आहे संपूर्ण बातमी –
जळगाव विमानतळाच्या सद्यस्थितीतील वापरत असलेल्या धावपट्टीच्या पूर्व भागात विमानतळाचे प्रस्तावित विस्तारीकरण करण्यासाठी जमीन संपादित करण्यात आली आहे. या संपादित क्षेत्रातील धावपट्टीच्या संरेखानामधून नशिराबाद ते उमाळे हा रस्ता जात आहे. मात्र, हा रस्ता वापरात असल्याने विमानतळाची धावपट्टी पूर्णतः विकासित करण्यात आलेली नाही. त्यामुळे ही धावपट्टी पूर्णतः विकसित करण्यासाठी नशिराबाद ते उमाळे हा रस्ता बंद करून पर्यायी मार्ग म्हणून प्रमुख जिल्हा मार्ग 109 चा वापर करणे प्रस्तावित आहे.
हा जिल्हा प्रमुख मार्ग 109 चा साखळी क्र.13/000 ते 18/000 दरम्यान रूंदीकरण करणे, चिंचोली ते नाशिराबाद उमाळा रस्त्यापर्यंतचा वाहिवाट रस्ता देणे व वाहिवाट रस्त्यावरील नाल्यावर पूल बांधणे इ. कामाकरिता 660.70 लक्ष रुपये इतक्या खर्चास प्रशासकीय व वित्तीय मान्यता देणेबाबतचा प्रस्ताव महाराष्ट्र विमानतळ विकास कंपनीने शासनास सादर केला होता. हा प्रस्ताव मुख्य सचिवांच्या अध्यक्षतेखाली स्थापन केलेल्या शक्ती प्रदत्त समितीच्या मान्यतेसाठी सादर करण्यात आला होता.
यानंतर शक्ती प्रदत्त समितीच्या 14 जानेवारी, 2025 रोजी संपन्न झालेल्या बैठकीत उक्त प्रस्तावास प्रशासकीय व वित्तीय मान्यता देण्यात आली असून त्यानुषंगाने शासन निर्णय निर्गमित करण्याची बाब शासनाच्या विचाराधीन होती. यास आता मान्यता देण्यात आली आहे.
काय आहे शासन निर्णय –
जळगाव विमानतळाची धावपट्टी पूर्णतः विकसित करण्यासाठी प्रस्तावित धावपट्टीच्या संरेखानामधून नशीरबाद ते उमाळे हा सद्या वापरत असलेल्या रस्ता बंद करून पर्यायी मार्ग म्हणून प्रमुख जिल्हा मार्ग 109 चे साखळी क्र.13/000 ते 18/000 दरम्यान रूंदीकरण करणे, चिंचोली ते नाशिराबाद उमाळा रस्त्यापर्यंतचा वाहिवाट रस्ता देणे व वाहिवाट रस्त्यावरील नाल्यावर पूल बांधणे इ. कामाकरिता 660.70 लक्ष रुपये खर्चास प्रशासकीय व वित्तीय मान्यता देण्यात येत आहे.
