जळगाव, 2 मे: महाराष्ट्र शासनाच्या वतीने जिल्ह्यातील युवांनी केलेल्या समाजिक कार्याचा गौरव व्हावा व युवा विकासाचे कार्य करण्यासाठी त्यांना प्रोत्साहन मिळावे, यासाठी जिल्हास्तरावर युवा पुरस्कार प्रतिवर्षी देण्यात येतो. समाजातील युवांची संख्या पाहता त्यांच्यातील नेतृत्व गुणांचा विकास करून युवकांना राष्ट्र उभारणीच्या कार्यात जोडण्यासाठी प्रतिवर्षी 1 मे रोजी जिल्हा युवा पुरस्कार दिले जातात. दरम्यान, यंदाचा जिल्हा युवा पुरस्कार (युवक) हा पाचोरा येथील कमलेश सोनवणे यास प्रदान करण्यात आला.
महाराष्ट्र दिनानिमित्त जळगावातील पोलिस परेड मैदानावर आयोजित कार्यक्रमात पालकमंत्री गुलाबराव पाटील यांच्या हस्ते कमलेश सोनवणे यास जिल्हा युवा पुरस्काराने सन्मानित करण्यात आले. याप्रसंगी जिल्हाधिकारी रोहन घुगे, जि. प. मुख्य कार्यकारी अधिकारी करिश्मा नायर, पोलिस अधीक्षक श्रीकांत धिवरे, जिल्हा क्रीडा अधिकारी जगदीश चौधरी व इतर मान्यवर उपस्थित होते.
शिक्षण, आरोग्य, लिंग समानता, क्रीडा, पर्यावरण अशा विविध क्षेत्रांत कार्य करणारा युवा चेहरा व व्याख्याता म्हणून कमलेशची ओळख असून याआधीही त्याने नवी दिल्लीतील विज्ञान भवन व भारत मंडपम येथे आपल्या व्याख्यानाने जळगाव जिल्ह्याचे नाव राष्ट्रीय पातळीवर उंचावले आहे. तो सध्या स्वतःची सामाजिक संस्था चालवत असून केंद्रीय युवा मंत्रालयाच्या ‘मेरा युवा भारत’चा सक्रिय स्वयंसेवक म्हणूनही कार्यरत आहे.
दरम्यान, यंदाच्या जिल्हा युवा पुरस्कारामुळे प्रोत्साहन मिळाले असून यापुढे अधिक जोमाने कार्य करत आपल्या अनुभव व कौशल्याने येणाऱ्या काळात जिल्ह्यातील तरुणाईसाठी मोठं काम उभं करणार असल्याची भावना कमलेश सोनवणे याने बोलून दाखवली.
कमलेशचे विविध क्षेत्रातून अभिनंदन –
कमलेशच्या ह्या यशाबद्दल जिल्हा युवा अधिकारी अभिषेक चवरे, उपजिल्हाधिकारी भूषण अहिरे, तहसीलदार विजय बनसोडे, के.सी.ई. शिक्षणसंस्थेचे अध्यक्ष नंदकुमार बेंडाळे व परिसरातील सर्वांनीच कमलेशचे कौतुक करत पुढील वाटचालीसाठी शुभेच्छा दिल्या. सामाजिक क्षेत्रात सोबत काम करण्यास इच्छुकांना संपर्कासाठी कमलेश सोनवणे ह्यांनी आवाहन केले आहे.
