जळगाव, 18 जून : राज्यात मे महिन्याच्या शेवटच्या आठवड्यात दाखल झालेल्या मॉन्सूनने संपूर्ण महाराष्ट्र व्यापले आहे. अशातच गुजरातमधील कमी दाबाच्या क्षेत्रामुळे पावसाला पोषक वातारवरण निर्माण झालंय. या पार्श्वभूमीवर कोकण, घाटमाथ्यावर पावसाचा जोरदार सरींची शक्यता असल्याने दक्षतेचा इशारा (ऑरेंज अलर्ट) देण्यात आला आहे. यासोबतच उत्तर महाराष्ट्र, उत्तर मराठवाडा आणि विदर्भात विजांसह जोरदार पावसाची शक्यता असल्याने सतर्कतेचा इशारा (येलो अलर्ट) हवामान विभागाने दिला आहे.
राज्यात पावसाला पोषक वातावरण –
हवामान विभागाच्या अंदाजानुसार, सध्यास्थितीत गुजरामतमध्ये कमी दाबाचे क्षेत्र निर्माण झालंय. यामुळे राज्यात पावसासाठी पोषक वातावरण आहे. यामुळे उत्तर महाराष्ट्र, उत्तर मराठवाडा आणि विदर्भात विजांसह जोरदार पावसाची शक्यता वर्तविण्यात आली आहे. दरम्यान, काल मंगळवारी 17 जून रोजी कोकण, घाटमाथा आणि मध्य महाराष्ट्रात मध्यम ते मुसळधार पावसाने हजेरी लावली आहे.
राज्यातील ‘या’ भागात अलर्ट –
हवामान विभागाने आज 18 जून रोजी कोकणातील रत्नागिरी, सिंधुदुर्ग, रायगड तसेच पालघर, पुणे घाटमाथा, सातारा घाटमाथा, कोल्हापूरच्या घाटमाथ्यावर जोरदार पावसाची शक्यता असल्याने दक्षतेचा इशारा (ऑरेंज अलर्ट) दिला आहे. यासोबतच मुंबई, ठाणे, नाशिक जिल्ह्यांच्या घाटमाथ्यावर जोरदार पावसाचा अंदाज व्यक्त करण्यात आला आहे. दरम्यान, उत्तर महाराष्ट्र, आणि उत्तर मराठवाड्यासह विदर्भात विजांसह वादळी पावसाची शक्यता असल्याने सतर्कतेचा इशारा (येलो अलर्ट) देण्यात आला असून उर्वरित राज्यात तुरळक ठिकाणी हलक्या पावसाची शक्यता आहे.
जळगाव जिल्ह्याचा हवामान अंदाज काय? –
जळगाव जिल्ह्यासह राज्यभरात पावसाने आतापर्यंत दमदार हजेरी लावलीय. या पार्श्वभूमीवर खरीप हंगामाच्या कामांना गती आलीय. जिल्ह्यात अनेक ठिकाणी शेतकऱ्यांकडून पेरणीला सुरूवात झालीय. असे असताना आज आणि उद्या जळगाव जिल्ह्यात वीजेच्या गडगडाट तसेच वादळासह मध्यम स्वरूपाचा पाऊस पडणार असल्याचा अंदाज वर्तविण्यात आला आहे.
हेही वाचा : Video | एरंडोलमध्ये अल्पवयीन मुलाची हत्या, नरबळीचा आरोप; जळगावचे एसपींनी दिली महत्वाची माहिती
