जळगाव, 24 मार्च: दरोड्याच्या गुन्ह्यातील फरार असलेल्या एका आरोपीस नशिराबाद पोलिसांनी गावठी कट्ट्यासह अटक केली आहे. ही कारवाई 23 मार्च रोजी सायंकाळी कोंबिंग ऑपरेशनदरम्यान करण्यात आली.
पोलीस अधीक्षकांच्या आदेशान्वये नशिराबाद पोलीस ठाण्याच्या हद्दीत कोंबिंग ऑपरेशन राबवित असताना सहाय्यक पोलीस निरीक्षक योगिता नारखेडे यांना गुप्त माहिती मिळाली की, भुसावळ शहर पोलीस ठाण्यात दाखल असलेल्या दरोड्याच्या गुन्ह्यातील फरार आरोपी चेतन सूर्यभान पाटील हा नशिराबाद येथील बसस्थानक परिसरात गावठी कट्टा घेऊन फिरत असून नागरिकांमध्ये दहशत निर्माण करत आहे.
या माहितीच्या आधारे पोलिस पथकाने तात्काळ कारवाई करत सायंकाळी सुमारे 8.20 वाजता अचानक छापा टाकून आरोपीला जागीच ताब्यात घेतले. आरोपीकडून एक लोखंडी चंदेरी रंगाचा गावठी कट्टा (काळ्या प्लास्टिक मुठीसह) तसेच एक डमी कट्टा जप्त करण्यात आला.
अटक करण्यात आलेला आरोपी चेतन सूर्यभान पाटील (वय 18, रा. वरची आळी, नशिराबाद, ता. जि. जळगाव) याच्याविरुद्ध नशिराबाद पोलीस ठाण्यात शस्त्र अधिनियम कलम 3/25 अन्वये गुन्हा दाखल करण्यात आला असून पुढील तपास सुरू आहे.
यांनी केली कारवाई –
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते व उपविभागीय पोलीस अधिकारी केदार बारबोले यांच्या मार्गदर्शनाखाली सहाय्यक पोलीस निरीक्षक योगिता नारखेडे, अंमलदार सहायक फौजदार राजेश मेंढे, पोहेकॉ कमलाकर बागुल, पोकॉ भरत बाविस्कर, पोकॉ पंकज सोनवणे, पोकॉ भुषण पाटील, पोकॉ विजय अहिरे यांनी यशस्वीरीत्या पार पाडली.
