पाचोरा, 12 डिसेंबर : पाचोरा तालुक्यातील परधाडे रेल्वे स्थानकाजवळ काल रविवारी एक दुर्दैवी घटना उघडकीस आली. याठिकाणी धावत्या रेल्वेखाली आल्याने एका व्यक्तीचा मृत्यू झाला. याप्रकरणी पाचोरा पोलीस ठाण्यात अकस्मात मृत्यूची नोंद करण्यात आली आहे.
काय आहे संपूर्ण बातमी –
ही घटना रविवारी 11 डिसेंबरला पहाटेच्या सुमारास उघडकीस आली. परधाडे परधाडे रेल्वे स्थानकाजवळ एका अनोळखी व्यक्तीचा धावत्या रेल्वेखाली आल्याने मृत्यू झाला. दरम्यान, या घटनेची माहिती मिळताच पाचोरा पोलीस ठाण्याचे पोलीस हेड कॉन्स्टेबल नरेंद्र नलवाडे, नरेंद्र शिंदे आणि रुग्णवाहिका चालक अमोल पाटील हे घटनास्थळी दाखल झाले.
यानंतर घटनास्थळाचा पंचनामा करण्यात आला. तर मृताची ओळख अद्याप पटलेली नाही. रुग्णवाहिका चालक अमोल पाटील यांच्या मदतीने मृतदेह पाचोरा ग्रामीण रुग्णालयात आणण्यात आला. या घटनेप्रकरणी पाचोरा पोलीस ठाण्यात अकस्मात मृत्यूची नोंद करण्यात आली आहे.
मृत व्यक्तीच्या नातेवाईकांचा पोलीस शोध घेत असून पाचोरा पोलीस ठाण्याचे पोलीस निरीक्षक प्रताप इंगळे यांच्या मार्गदर्शनाखाली एएसआय ज्ञानेश्वर पाटील हे पुढील तपास करत आहेत.
