चंद्रकांत दुसाने, विशेष प्रतिनिधी
मुंबई, 8 जून : राज्याचे उपमुख्यमंत्री एकनाथ शिंदे हे परवा जळगाव जिल्हा दौऱ्यावर होते. उपमुख्यमंत्री शिंदे यांच्या उपस्थितीत जिल्ह्यातील मुक्ताईनगरात शुक्रवारी सायंकाळनंतर संत मुक्ताई पालखी प्रस्थान सोहळा पार पडला. दरम्यान, हा दौरा आटोपून त्याच दिवशी रात्री उशिरा मुंबईच्या दिशेने रवाना होत असताना नियोजित वेळेपेक्षा विमानाचे उड्डाण होण्यास उशीर झाला. तर दुसरीकडे एका महिला रुग्णाला उपचारासाठी मुंबईला जाणे आवश्यक असताना उपमुख्यमंत्री शिंदे यांनी संबंधित महिलेला आपल्या विमानातून मुंबईला नेण्याची तत्परता दाखवली. दरम्यान, आता महिलेच्या शस्त्रकियेबाबत महत्वाची माहिती समोर आली आहे.
जळगाववरून उपमुख्यमंत्री एकनाथ शिंदे यांच्या विशेष विमानामध्ये शितल बोरडे यांना सोबत आणलं. प्रवासादरम्यान त्यांनी या महिलेशी चर्चा करत त्यांच्यावर सुरू असलेल्या उपचारांची आस्थेवाईकपणे चौकशी केली. तसेच मुंबईत आल्यावर त्यांच्यासाठी विशेष रुग्णवाहिका उपलब्ध करून देत या महिलेला मुंबईतील बॉम्बे रुग्णालयात दाखल करण्यात आले. यानंतर रात्रभर उपमुख्यमंत्री वैद्यकीय सहायता कक्षाचे प्रमुख मंगेश चिवटे यांच्यासह उपमुख्यमंत्री एकनाथ शिंदे यांचे ओसडी तसेच स्वीय सहायक डॉक्टरांच्या संपर्कात होते.
मात्र, काही कारणास्तव काल 7 जून रोजी शितल यांची शस्त्रक्रिया पार पडली नाही. यामुळे शस्त्रक्रिया न झाल्याने शितल बोरडे यांना विशेष गाडीतून अकोला या ठिकाणी रवाना करण्यात आले. दरम्यान, मंगेश चिवटे यांनी उपमुख्यमंत्री एकनाथ शिंदे यांना फोनवरून सविस्तर माहिती दिली. यावेळी उपमुख्यमंत्री शिंदे यांनी शितल यांच्याशी संवाद साधत चौकशी केली. यावेळी शितल या भावुक झाल्या आणि मला तुमच्या रूपात वडील आणि भाऊ मिळाला अशी प्रतिक्रिया शितल यांनी दिली आहे. तसेच मी या रक्षाबंधनला तुमच्याकडे येऊन तुम्हाला राखी बांधणार असल्याचे सांगितले.
हेही पाहा : हवामानात बदल का होतोय? | जागतिक पर्यावरण दिन | पर्यावरण तज्ज्ञ अतुल देऊळगावकर यांची विशेष मुलाखत
