पुणे, 22 जुलै : राज्यात गुन्हेगारीच्या घटनांमध्ये वाढ होत असतानाच पुण्यातून हादरवणारी घटना समोर आली आहे. पुणे येथे विवाहबाह्य संबंधातून गर्भवती राहिलेल्या प्रेयसीचा गर्भपात करताना मृत्यू झाल्याने प्रियकराने तिचा मृतदेह इंद्रायणी नदीत फेकल्याची धक्कादायक घटना उघडकीस आली आहे. दरम्यान, आईचा मृतदेह पाहून तिचे दोन्ही मुले रडायला लागल्यानंतर आरोपी प्रियकराने आपल्या मित्रासह मृत महिलेच्या दोन्ही मुलांनाही नदीत फेकून दिल्याची माहिती समोर आली आहे. याप्रकरणी प्रियकर गजेंद्र दगडखैर आणि त्याचा मित्र रविकांत गायकवाड यांना पोलिसांनी अटक केली आहे.
नेमकं काय घडलं? –
मिळालेल्या माहितीनुसार, गजेंद्र दगडखैर आणि मृत महिलेचे विवाहबाह्य संबंध होते. काही दिवसाने महिला गर्भवती राहिली होती. आरोपीने महिलेला गर्भपात करण्यासाठी पुण्यातील कळंबोली येथे त्याच्या मित्रासोबत पाठवले. मात्र, 8 जुलै रोजी उपचारादरम्यान तिचा मृत्यू झाला. यानंतर आरोपींनी महिलेचा मृतदेह आणि तिच्या दोन मुलांना 9 जुलै रोजी वराळे येथे नेले आणि महिलेचा मृतदेह इंद्रायणी नदीत फेकून दिला.
दोन्ही मुलांना नदीत फेकून दिले –
आईचा मृतदेह पाहून तिचे दोन्ही मुले मोठमोठ्याने रडू लागल्याने या मुलांमुळे आपण पोलिसांच्या तावडीत सापडू असे त्यांना वाटले. पुढे त्यांनी कशाचाही विचार न दोन्ही मुलांना देखील नदीत फेकून दिले. दरम्यान, दुसऱ्या दिवसांपासून आरोपी काही घडलेच नाही, असे वावरू लागले. महिला आणि तिचे दोन्ही मुले बेपत्ता असल्याने तिच्या नातेवाईकांनी जवळच्या पोलीस स्टेशनमध्ये संपर्क साधला.
आरोपींना पोलिसांनी केली अटक –
याप्रकरणी पोलिसांनी अधिक तपासणी केली असता बेपत्ता महिलेचे मुख्य आरोपी गजेंद्रसोबत अनेकदा फोनवर बोलणे झाल्याचे निष्पन्न झाले. दरम्यान, पोलिसांनी गजेंद्रची कसून चौकशी केली. मात्र, तो उडवाउडवीची उत्तरे देत होता. शेवटी पोलिसी खाक्या दाखवण्यात आला अन् त्याने घडलेला प्रकार कबूल केला. याप्रकरणी पोलिसांनी मुख्य आरोपी आणि त्याच्या मित्राला अटक केली असून पुढील चौकशीला सुरुवात केली आहे.
हेही वाचा : लाखोंची रोकड लूटणाऱ्या टोळीतील म्होरक्याला अटक, जळगाव गुन्हे शाखेची मोठी कामगिरी, नेमकं काय प्रकरण?
