जळगाव, 8 मार्च : राज्यात दिवसेंदिवस महिला अत्याचाराच्या घटनांमध्ये वाढ होत असताना राष्ट्रवादी काँग्रेस शरद पवार गटाच्या प्रदेशाध्यक्ष रोहिणी खडसे यांनी आज राष्ट्रपतींकडे एक खून माफ करण्यात यावा, अशी पत्राच्या माध्यमातून मागणी करत आज सह्याद्री अतिथागृहाबाहेर आंदोलन केले. दरम्यान, रोहिणी खडसेंच्या विधानावर प्रतिक्रिया देताना गुलाबराव पाटील यांनी टोला लगावलाय.
गुलाबराव पाटील काय म्हणाले? –
आंतरराष्ट्रीय महिला दिनानिमित्त पालकमंत्री गुलाबराव पाटील यांच्या उपस्थितीत कार्यक्रमाचे आयोजन करण्यात आले होते. यानंतर मंत्री गुलाबराव पाटील यांना पत्रकारांनी रोहिणी खडसे यांच्या वक्तव्याबाबत विचारले असता त्यांनी खोचक टोला लगावला. ते (रोहिणी खडसे) कुणाचा करतायए खून त्यांचं नाव सांगाव, असे मंत्री गुलाबराव पाटील यावेळी म्हणाले.
रोहिणी खडसे यांनी आपल्या पत्रात काय म्हटले? –
राष्ट्रवादी महिला काँग्रेस शरदचंद्र पवार गटाच्या प्रदेशाध्यक्षा रोहिणी खडसे यांनी आपल्या पत्रात लिहिले की,
मा. द्रौपदी मूर्मू राष्ट्रपती, भारत
विषय :- एक खुन माफ करणेबाबत
‘महोदया, सर्वात प्रथम आपल्याला जागतिक महिला दिनाच्या हार्दिक शुभेच्छा ! आपला देश हा महात्मा बुद्ध आणि महात्मा गांधींचा देश म्हणून ओळखला जातो. जे शांतीचे अहिंसेचे मोठे प्रतीक आहे तरी आपली क्षमा मागून वरील मागणी करत आहे. कारणही तसेच आहे…आज देशात महिला मोठ्या प्रमाणात असुरक्षित आहेत. येणाऱ्या प्रत्येक दिवशी महिलांवरील अत्याचारांच्या घटनेत वाढ होत आहे.
दोनच दिवसांपूर्वी पूर्वी देशाची आर्थिक राजधानी मुंबई येथे एका 12 वर्षीय मुलीवर सामूहिक अत्याचार करण्यात आले. राष्ट्रपती महोदया, 12 वर्षीय ! विचार करा काय परिस्थिती असेल? नुकताच वर्ल्ड पॉपुलेशन रिव्यू सर्व्हे आला आहे, अशा बातम्या आम्ही वाचल्या. या सर्व्हेमध्ये महिलांसाठी असुरक्षित असलेल्या जगातील विविध देशांचा उल्लेख केला आहे.
या सर्व्हे नुसार आशिया खंडात भारत सर्वात असुरक्षित देश असल्याचे म्हटले गेले आहे. महिलांचे अपहरण, महिला बेपत्ता होण्याचे प्रकार, घरगुती हिंसाचार आणि अन्य गंभीर विषयांचाही समावेश आहे. त्यामुळे आम्हाला एक खुन माफ करा अशी आम्ही समस्त महिलांच्या वतीने मागणी करतो. आम्हाला खुन करायचा आहे अत्याचारी मानसिकतेचा, बलात्कारी प्रवृत्तीचा, निष्क्रिय असलेल्या कायदा सुव्यवस्थेचा.
महोदया, आपल्या राज्यावर, देशावर संकट आले म्हणून महाराणी ताराराणी, पुण्यश्लोक अहिल्यादेवी होळकर यांनी तलवार उपसली होती मग आमचा समाज सुधारण्यासाठी आम्ही का मागे राहावे.आमच्या मागणीचा यथोचित विचार करून आपण आमची मागणी मान्य कराल ही अपेक्षा करते. हीच तुमच्याकडून आम्हाला जागतिक महिला दिनाची भेट समजू.
धन्यवाद! सौ रोहिणी खड़से खेवलकर प्रदेशाध्यक्षा, राष्ट्रवादी महिला काँग्रेस पक्ष शरदचंद्र पवार
हेही वाचा : VIDEO : ‘आम्हाला एक खून माफ करा’; रोहिणी खडसेंची राष्ट्रपती द्रौपदी मुर्मूंकडे अनोखी मागणी, कारण काय?
