ईसा तडवी, प्रतिनिधी
पाचोरा, 10 मार्च : पाचोरा शहरातील भडगाव रोड स्थित पोलीस कर्मचारी निवास्थानांची झालेली दुर्दशा पाहता तसेच शहराचा वाढलेला विस्तार लक्षात घेता आमदार किशोर आप्पा पाटील यांनी गृह विभागाकडे सातत्याने पाठपुरावा करत तब्बल 21 कोटी रुपयांच्या निधीला मंजुरी मिळवली आहे. दरम्यान, एकच ठिकाणी पोलीस कर्मचारी व अधिकाऱ्यांचे निवासस्थानांचे बांधकाम केले जाणार असून यामुळे पोलीस बांधवांच्या कामात अधिक सुसूत्रता येणार आहे. या कामामुळे दुरावस्था होऊन मोडकळीस आलेल्या पोलीस वसाहती मधील निवाऱ्यांपासून त्यांना सुटका मिळणार आहे.
आमदारांसह जिल्हा पोलीस अधीक्षकांच्या उपस्थितीत उद्या भूमिपूजन –
पाचोरा शहरातील पोलीस लाईन या ठिकाणी नव्याने उभारण्यात येणाऱ्या पोलीस स्टेशन तसेच अधिकारी व कर्मचारी निवासस्थानांच्या कामाचे भूमिपूजन उद्या, मंगळवारी दुपारी 3 वाजता आमदार किशोर आप्पा पाटील यांचे हस्ते होणार असून यावेळी जिल्हा पोलीस अधीक्षक डॉ. महेश्वर रेड्डी यांचेसह मान्यवरांची उपस्थिती असणार आहे.
या भूमिपूजन कार्यक्रमाला प्रांताधिकारी भूषण अहिरे, अप्पर पोलिस अधीक्षक नेतकर, उपविभागीय पोलिस अधिकारी धनंजय येरुळे, तहसीलदार विजय बनसोडे, शिवसेनेचे जिल्हा प्रमुख रावसाहेब पाटील, बाजार समितीचे सभापती गणेश पाटील, माजी नगराध्यक्ष संजय गोहिल, मुख्याधिकारी मंगेश देवरे, पोलिस निरीक्षक अशोक पवार यांची उपस्थिती लाभणार आहे. तरी सर्वांनी या भूमिपूजन कार्यक्रमाला उपस्थित रहावे, असे आवाहन करण्यात आले आहे.
