ईसा तडवी, प्रतिनिधी
पाचोरा, 24 ऑक्टोबर : महायुतीतील भाजप, शिवसेना तसेच राष्ट्रवादी काँग्रेस या तीनही पक्षांकडून विधानसभा निवडणुकीसाठी उमेदवारांची पहिली यादी जाहीर करण्यात आली आहे. यामध्ये शिवसेनेकडून पाचोरा-भडगाव विधानसभा मतदारसंघाचे विद्यमान आमदार किशोर आप्पा पाटील यांना तिसऱ्यांदा तिकिट देण्यात आले आहे. दरम्यान, आमदार किशोर आप्पा पाटील हे आज तिसऱ्यांदा उमेदवारी अर्ज दाखल करणार असून पाचोऱ्यात त्यांचे शक्तीप्रदर्शन पाहायला मिळणार आहे.
पाचोऱ्यात किशोर आप्पा पाटील यांचे आज शक्तीप्रदर्शन –
विधानसभा निवडणुकीच्या घोषणेनंतर आमदार किशोर आप्पा पाटील यांनी जागावाटपा आधीच उमेदवारी अर्ज दाखल करण्याची तारीख जाहीर केली होती. त्यानुसार, आज 24 ऑक्टोबर रोजी दुपारी 11 वाजता आमदार किशोर आप्पा पाटील हे उमेदवारी अर्ज दाखल करणार आहेत. यावेळी जळगाव जिल्ह्याचे पालकमंत्री तथा शिवसेना नेते गुलाबराव पाटील हे देखील उपस्थित राहणार आहेत.
‘असे’ आहे नियोजन –
आमदार किशोर आप्पा पाटील यांचा उमेदवारी अर्ज दाखल करण्यासाठी जनसभेचे आयोजन करण्यात आले असून पाचोऱ्यातील मोंढाळा रोडवरील तुळजाई जिनिंग याठिकाणी ही सभा पार पडणार आहे. यानंतर जळगाव चौफुली वरून रॅलीला सुरूवात होऊन भारत डेअरी, कृष्णापुरी चौक, आठवडे बाजार, गांधी चौक, जामनेर रोड, छत्रपती शिवाजी महाराज चौक ते प्रांत कार्यालयापर्यंत पोहचणार आहेत.
तिसऱ्यांदा उमेदवारी अर्ज करणार दाखल –
पाचोरा-भडगाव या विधानसभा मतदारसंघाचे आमदार किशोर आप्पा पाटील हे गेल्या दहा वर्षांपासून प्रतिनिधीत्व करत आहेत. सलग दोन वेळा ते या मतदरासंघाचे आमदार असून आता ते तिसऱ्यांदा उमेदवारी अर्ज दाखल करणार आहेत. दरम्यान, या मतदारसंघात आतापर्यंत सलग तिसऱ्यांदा एकाही उमेदवाराने विजय मिळवला नाहीये. म्हणून आमदार किशोर आप्पा पाटील हे तिसऱ्यांदा निवडून येऊन मतदारसंघात इतिहास घडवणार का?, याकडे सर्वांचे लक्ष लागले आहे.
हेही वाचा : Jalgaon Crime : 2 कोटींची रोकड जप्त; विधानसभा निवडणुकीच्या पार्श्वभूमीवर जळगाव पोलिसांची मोठी कारवाई
