एक देश एक निवडणूक : ‘निवडणुकांचं महत्व इतकंच वाटतंय तर….’, राज ठाकरेंनी केंद्र सरकारला सुनावले

मुंबई : माजी राष्ट्रपती रामनाथ कोविंद यांच्या अध्यक्षतेखालील समितीने ‘एक देश, एक निवडणूक’ राबविण्यासाठीचा अहवाल मार्च 2024 मध्ये केंद्र सरकारकडे सोपविला होता. यानंतर अखेर 5 महिन्यांनंतर आज बुधवारी केंद्रीय मंत्रिमंडळाने अहवालावर शिक्कामोर्तब केले. आज केंद्रीय मंत्रिमंडळाने ‘एक देश एक निवडणूक’ संकल्पनेला मंजुरी दिली आहे. मात्र, यानंतर अनेक जण सरकारच्या या निर्णयावर प्रश्न उपस्थित करत आहेत. त्यातच आता महाराष्ट्र नवनिर्माण सेनेचे अध्यक्ष राज ठाकरे यांनीही केंद्र सरकारच्या एक देश एक निवडणूक या संकल्पनेवर शंका उपस्थित केल्या आहेत.

काय म्हणाले राज ठाकरे – 

सोशल मीडिया प्लॅटफॉर्म एक्सवर राज ठाकरे यांनी केंद्र सरकारच्या ‘एक देश, एक निवडणूक’ या संकल्पेवर प्रतिक्रिया दिली. त्यांनी म्हटले की, ‘एक देश एक निवडणूक’ संकल्पनेला आज केंद्रीय मंत्रिमंडळाने मान्यता दिली. अर्थात ही फक्त केंद्रीय मंत्रिमंडळाची मान्यता आहे आणि अजून याला संसदेची मान्यता लागेल. आणि अर्थात देशातील प्रत्येक राज्याचा कौल पण विचारात घ्यावाच लागेल. आणि कौलचा अर्थ वरवरची मान्यता नाही तर अशा प्रकारांनी राज्यांच्या अधिकारांना, स्वायत्ततेला धक्का पोहचणार नाही, याची खातरजमा पण व्हायलाच हवी.

बरं जर एखाद्या राज्यात सरकार कोसळलं किंवा किंवा तिथली विधानसभा बरखास्त झाली तर तिकडे आधी निवडणूक होणार का? त्या राज्याने लोकसभेचा कार्यकाळ संपेपर्यंत वाट पहायची? किंवा समजा काही कारणांनी लोकसभेच्या मध्यावधी निवडणुका लागल्या तर देशातील सगळ्या निवडणुका परत होणार का? असा कुठलाच खुलासा झालेला नाही. तो कदाचित होईल. असो…

पण ‘एक देश एक निवडणूक’ हे सर्व ठीक आहे, आधी राज्यातल्या महापालिका, नगरपालिकांच्या निवडणुका घ्या. येत्या ऑक्टोबर 2024 मध्ये कित्येक महापालिकांमध्ये, नगरपालिकांमध्ये प्रशासक येऊन 4 वर्ष होतील. इतका काळ नगरसेवक नाहीत म्हणजे लोकप्रतिनिधी नाहीत. ते जास्त महत्वाचं नाही का? स्थानिक स्वराज्य संस्थांचा थेट संबंध सामान्य माणसांच्या जगण्याशी, त्यांच्या प्रश्नांशी असतो. त्याच्याच निवडणुका होत नसतील तर सामान्य माणसाने जायचं कोणाकडे? निवडणुकांचं महत्व इतकंच वाटतंय तर या स्थानिक स्वराज्य संस्थांच्या निवडणुका लवकरात लवकर घ्या…’, या शब्दात मनसे अध्यक्ष राज ठाकरे यांनी केंद्र सरकारला सुनावले आहे.

हेही वाचा – Yogendra Puranik Interview : जपानमधील मराठमोळे आमदार योगेंद्र पुराणिक यांची विशेष मुलाखत

बातमी शेअर करा !