मुक्ताईनगर : मुक्ताईनगर येथे मुक्ताईच्या यात्रेत झालेल्या छेडछाडप्रकरणी आतापर्यंत 6 जणांवर गुन्हा दाखल करण्यात आला आहे, अशी माहिती पोलिसांनी दिली. तसेच या प्रकरणातील आरोपींची नावेही पोलिसांनी सांगितली.
जळगाव जिल्ह्यातील मुक्ताईनगर तालुक्यातील कोथळी गावातील संत मुक्ताईच्या यात्रेत टवाळखोर मुलांनी केंद्रीय मंत्री रक्षा खडसे यांच्या मुलीसह इतर काही मुलींची छेडछाड केल्याचा धक्कादायक प्रकार घडला आहे. या मुलींच्या मनाविरुद्ध काही टवाळखोर मुलांनी फोटोही काढले. या धक्कादायक प्रकारानंतर टवाळखोर मुलांना तातडीने अटक व्हावी, अशी मागणी केंद्रीय मंत्री रक्षा खडसे यांनी पोलिसांकडे केली. याप्रकरणी मुक्ताईनगर पोलीस ठाण्यात 6 तरुणांविरोधात गुन्हा दाखल करण्यात आला आहे.
पोलीस उपअधीक्षक कृष्णात पिंगळे यांनी पत्रकार परिषदेत सांगितले की, 28 फेब्रुवारी 2025 रोजी रात्री पाऊणेनऊच्या दरम्यान, मुक्ताईनगर पोलीस स्टेशन हद्दीतील कोथळी या गावी यात्रेच्या दरम्यान, पाळण्यात बसण्याच्या दरम्यान, काही मुली त्याठिकाणी गेलेल्या होत्या. यावेळी अनिकेत भोई, पीयूष मोरे, सोहम कोळी, अनुष पाटील, किरण माळी आणि सचिन पालवे यांनी त्या मुलींचा पाठलाग करुन पाळण्यात बसलेले असताना त्यातल्या एका मुलीला त्यांनी धक्काही दिला.
मोबाईलमध्ये व्हिडिओ कॉल केलेला होता, असं त्यातील एका पीडित मुलीचं म्हणणं आहे. त्या अनुषंगाने आपण या आरोपींविरोधात मुक्ताईनगर पोलीस ठाण्यात गुन्हा दाखल केलेला आहे. विनयभंग, पोक्सो कायद्यांतर्गत हा गुन्हा दाखल करण्यात आला आहे. त्या अनुषंगाने तपास सुरू आहे. यातील आरोपींना अद्याप अटक झालेली नाही. या आरोपींना तत्काळ अटक करण्यात येईल. यातील अनिकेत भोई नावाच्या आरोपीविरोधात याआधी 4 गुन्हे दाखल आहेत. बाकीचे इतर आरोपी आहेत. त्या आरोपींविरोधात कोणताही गुन्हा दाखल नाही, अशी माहिती त्यांनी दिली.
आमच्यावर कुणाचाही दबाव नाही –
याप्रकरणातील आरोपी स्थानिक लोकप्रतिनिधींचे कार्यकर्ते असल्याचं बोललं जात आहे. माध्यमांच्या या प्रश्नावर पोलीस उपअधीक्षक कृष्णात पिंगळे म्हणाले की, यामध्ये आतापर्यंत कुठल्याही स्थानिक लोकप्रतिनिधीने याप्रकरणात अद्याप संपर्क केलेला नाही. पोलीस याप्रकरणी कायदेशीर कार्यवाही करेल. आमच्यावर कुणाचाही दबाव नाही.
हेही वाचा – संतापजनक! केंद्रीय मंत्री रक्षा खडसेंच्या मुलीची छेडछाड, नेमकं काय घडलं, संपूर्ण घटनाक्रम..
