जळगाव, 12 जून : राज्यात यंदा मे महिन्याच्या अखेरीस मान्सूनने धडक दिली. असे असताना काही दिवस मान्सूनच्या पावसात खंड पडल्याचे दिसून आले. दरम्यान, राज्यात मान्सून पुन्हा सक्रिय झाला असून पुढील तीन-चार दिवस पावसाची शक्यता हवामान विभागाने वर्तवली आहे.
हवामान विभागाच्या अंदाजानुसार, राज्यात पुन्हा एकदा मान्सून सक्रिय झाला आहे. यामुळे राज्यातील अनेक भागांमध्ये मध्यम ते मुसळधार पावसाची शक्यता आहे. तसेच पुढील तीन-चार दिवस पावसाचे राहणार आहेत. दरम्यान, हवामान खात्याने नागरिकांना सतर्क राहण्याचे आवाहन केले असून शेतकऱ्यांनी देखील कृषी विभागाचा सल्ला घेऊन पेरणी करावी, असा सल्लाही देण्यात आला आहे.
जळगाव जिल्ह्यात वादळी वाऱ्यासह मुसळधार पाऊस –
जळगाव शहरासह जिल्ह्यात विजांच्या कडकडाटासह जोरदार पाऊस व वादळी वाऱ्यामुळे काही ठिकाणी झाडे पडली. तर काही ठिकाणी वाहतुकीस अडथळे निर्माण होणे अशी परिस्थिती निर्माण झाली. या पार्श्वभूमीवर जिल्हाधिकारी आयुष प्रसाद यांच्या नेतृ्त्वाखाली प्रशासनातील अधिकाऱ्यांनी विविध भागांना भेट देऊन परिस्थितीची पाहणी केली.पाचोरा तालुक्यातील बांबरुड राणीचे येथील पितांबर आत्माराम वाघ (वय 50 वर्षे) यांचा घरी वीज पडून मृत्यू झाला. तसेच एरंडोल तालुक्यातील फरकांडे येथे नारायण सीताराम पाटील (वय 68 वर्ष) यांचा घराचे पत्रे लागून मृत्यू झाला. यासोबतच मेहरूण येथील संतोष चिंधु तायडे (रा. मंगलपुरी) बांधाच्या वरती विज पडून गाय मरण पावली आहे. दरम्यान, आपत्कालीन व्यवस्थापन यंत्रणा सतर्क असून, नागरिकांनी आवश्यक खबरदारी घ्यावी व आवश्यक असल्यास 1077 या जिल्हा आपत्ती व्यवस्थापन टोल-फ्री क्रमांकावर संपर्क साधण्याचे आवाहन जिल्हा प्रशासनाच्यावतीने करण्यात आले आहे.
जळगाव जिल्ह्याचा हवामान अंदाज काय?-
जळगाव जिल्ह्याला काल वादळी वाऱ्यास मुसळधार पावसाने झोडपले. जळगाव जिल्ह्यात पुढील चार दिवस जोरदार पावसाची शक्यता वर्तविण्यात आली आहे.
- 12 जून – आकाश अंशतः ढगाळ राहील – वीजेच्या गडगडाटासह पावसाची शक्यता
- 13 जून – आकाश अंशतः ढगाळ राहील – मध्यम पाऊस किंवा गडगडाटी वादळाची शक्यता
- 14 जून- आकाश अंशतः ढगाळ राहील – मध्यम पाऊस किंवा गडगडाटी वादळाची शक्यता
- 15 जून – आकाश अंशतः ढगाळ राहील – मध्यम पाऊस किंवा गडगडाटी वादळाची शक्यता
हेही वाचा : धक्कादायक! बांबरूड (राणीचे) येथे वीज पडून एकाचा मृत्यू; फळबागांचे मोठ्या प्रमाणात नुकसान
