नाशिक, 15 नोव्हेंबर : नाशिकमधील संत कबीरनगर आणि महात्मानगर परिसरात तब्बल चार तास बिबट्याने धुमाकूळ घालत वन विभागाच्या दोन कर्मचाऱ्यांसह दोन नागरिकांना जखमी केले. साडेपाचच्या सुमारास भुलीचे इंजेक्शन डोज दिल्यानंतर अखेर त्याला सुरक्षितपणे पकडण्यात आले. दरम्यान, मंत्री गिरीश महाजन यांनी जखमींची रूग्णालयात जाऊन विचारपूस केली.
भरवस्तीत बिबट्याचा प्रवेश –
सातपूरच्या कॅनाल रोड लगतच्या झाडाझुडपासून बिबट्या नागरी वस्तीत शिरला आणि सर्वप्रथम एका महिलेला जखमी केले. त्यानंतर संत कबीरनगर परिसरात आणखी तिघांवर हल्ला केल्यानंतर तो वनविहार कॉलनीकडे पळाला. या उच्चभ्रू वसाहतीत बिबट्याने एका दुकानाच्या मागील बाजूस, बेकरीमध्ये आणि दोन बंगल्यांच्या परिसरात लपून बसत जवळपास तीन तास धुमाकूळ घातला.
रेस्क्यू मोहीम यशस्वी –
वनविभागाच्या पथकाने राबवलेल्या धाडसी रेस्क्यू ऑपरेशनमध्ये दोन कर्मचारी जखमी झाले. शेवटी रायफलच्या साहाय्याने भुलीचे इंजेक्शन मारण्यात आले आणि बिबट्याला बेशुद्ध अवस्थेत पकडण्यात आले.
मंत्री गिरीश महाजन यांनी घेतली जखमींची भेट –
गंगापूर रोड परिसरातील या घटनेमुळे शहरात मोठी खळबळ उडाली होती. जखमी दोन नागरिक आणि दोन वनकर्मचाऱ्यांना श्री गुरुजी रुग्णालयात दाखल करण्यात आले असून त्यांची प्रकृती स्थिर आहे. राज्याचे मंत्री गिरीश महाजन यांनी रुग्णालयात भेट देऊन सर्वांच्या प्रकृतीची विचारपूस केली.
