मुंबई : चार पक्ष फिरून येऊन तुम्ही आरामात ज्या पक्षाच्या विधान परिषदेची जागा मिळवलीय ना आणि भाजपसारख्या भल्या मोठ्या वटवृक्षाच्या सावलीत आरामात बसलात ना, त्यात माझ्या वडिलांचे कष्ट आहेत. माझ्या वडिलांनी कधी आकांडतांडव करून प्रसिद्धी मिळवली नाही. त्यामुळे आपण कुणाबाबत बोलतो हे लक्षात घेऊन बोला. उगाचच उचलली जीभ लावली टाळ्याला नको, या शब्दात राष्ट्रवादी काँग्रेस शरद पवार गटाच्या महिला प्रदेशाध्यक्षा रोहिणी खडसे यांनी विधान परिषदेच्या आमदार चित्रा वाघ यांना प्रत्युत्तर दिले आहे.
नेमकं काय घडलं होतं –
दिशा सालियन प्रकरणावरुन ठाकरे गटाचे विधानपरिषद आमदार अनिल परब आणि भाजपच्या नेत्या चित्रा वाघ यांच्यात चांगलीच खडाजंगी झाली. ‘ओ परब, तुमच्यासारखे 56 पायाला बांधून फिरते मी’, असे म्हणत चित्रा वाघ यांनी कमरेखालील भाषा वापरल्याचा आरोप होत आहे. चित्रा वाघ यांच्या या वक्तव्यानंतर अनेकांनी त्यांच्यावर टीका केली. शरद पवार गटाच्या महिला प्रदेशाध्यक्ष रोहिणी खडसे यांनी चित्रा वाघ यांच्यावर एक उपरोधिक व्हिडिओ शेअर करत टीका केली होती.
चित्रा वाघ यांच्यावर निशाणा साधताना ‘बाईईईईई काय हा प्रकार… थोडं थोडं साम्याच आहे, नाही ! पण कोणीतरी सांगा ते आपल्या राज्याचे ते सर्वोच्च सभागृह आहे.. बिग बॉसचा एखादा सीजन नाही!!’, असं म्हटलं होतं. चित्रा वाघ यांनी कोणाला तरी खूश कऱण्यासाठी केलं होतं का? असा सवाल रोहिणी खडसे यांनी केला होता. यावर ‘रोहिणी खडसे यांचे वडील विधान परिषदेत माझ्या समोर बसतात. त्यांनी त्यांना विचारावं, ते जास्त चांगलं सांगतील’, असा टोमणा चित्रा वाघ यांनी रोहिणी खडसेंना लगावला होता. चित्रा वाघ यांच्या या टोमण्यानंतर रोहिणी खडसेंनी त्यांच्यावर निशाणा साधला.
काय म्हणाल्या रोहिणी खडसे?
सोशल मीडिया प्लॅटफॉर्म एक्सवर लिहिताना रोहिणी खडसे म्हणाल्या की, माझ्या वडिलांचं नाव घेऊन बोलण्याआधी त्यांच्या गेल्या 40 वर्षांच्या राजकीय कारकीर्दीची तरी माहिती घ्यावी ! ते कोण आहेत, भाजप या पक्षासाठी त्यांचं योगदान काय… याची माहिती कृपा करून तुमच्या वरिष्ठ नेत्यांकडून जाणून घ्यावी आणि मग बोलावं…
तुम्ही ज्या पक्षाकडून विधान परिषदेच्या सदस्या झाला आहात त्या पक्षाला शून्यातून एका वटवृक्षात रुपांतर करण्यात, वाढवण्यात ज्या ठराविक लोकांची नावे घेतली जातात, त्यात माझ्या वडिलांचे नाव अग्रक्रमाने येते.
चार पक्ष फिरून येऊन तुम्ही आरामात ज्या पक्षाच्या विधान परिषदेची जागा मिळवलीय ना आणि भाजपसारख्या भल्या मोठ्या वटवृक्षाच्या सावलीत आरामात बसलात ना, त्यात माझ्या वडिलांचे कष्ट आहेत. विचारा तुमच्या वरिष्ठांना… शेतकरी, दुर्लक्षित घटक, ओबीसी बांधव आणि शेवटच्या घटकापर्यंतच्या माणसाला न्याय देण्याचा प्रयत्न करत ते इथवर आलेले आहेत आणि लोकांच्या प्रश्नांना वाचा फोडण्याचा प्रवास आजतागायत सुरूच आहे. यात कधी त्यांनी आकांडतांडव करून प्रसिद्धी मिळवली नाही ! त्यामुळे आपण कुणाबाबत बोलतो हे लक्षात घेऊन बोला… उगाचच उचलली जीभ लावली टाळ्याला नको, या शब्दात रोहिणी खडसेंनी आमदार चित्रा वाघ यांना प्रत्युत्तर दिले आहे.
हेही वाचा – Jalgaon Murder : जळगावात शिंदे गटाच्या माजी उपसरपंचाचा खून, पोलीस अधीक्षकांनी दिली महत्त्वाची अपडेट
