नंदुरबार रेल्वे स्थानकातील 'त्या' तरुणाच्या हत्त्याप्रकरणी 9 जणांना अटक, नेमकं काय प्रकरण?

नंदुरबार, 12 फेब्रुवारी : चेन्नई-जोधपूर एक्स्प्रेसमध्ये 2 फेब्रुवारी रोजी बसण्याच्या जागेवरून वाद झाल्याचा प्रकार उघडकीस आला होता. यावेळी टोळक्याने नंदुरबार रेल्वे स्टेशनवर केलेल्या हल्ल्यात दोन राजस्थानी प्रवासी जखमी झाले होते. यातील 27 वर्षीय सुमेरसिंग जबरसिंग याचा उपचारादरम्यान मृत्यू झाला. दरम्यान, याप्रकरणात वाढीव कलमान्वये गुन्हा दाखल झाल्यानंतर संशयितांच्या शोधासाठी गती देण्यात आली होती. अखेर, नंदुरबार पोलीस आणि लोहमार्ग पोलिसांनी याप्रकरणी नऊ संशयितांना अटक केल्याची माहिती समोर आहे.

काय आहे संपुर्ण बातमी? –
मिळालेल्या माहितीनुसार, चेन्नई-जोधपूर या रेल्वेने 2 फेब्रुवारी रोजी राजस्थानमधील जोधपूर जिल्ह्यातील निंबो या गावाचे करणसिंह जबरसिंह हे लहान भाऊ सुमेरसिंह जबरसिंह (27), महेंद्रसिंह जबरसिंह (25), अनुपसिंह जबरसिंह (23) तसेच त्यांच्या गावातील असलसिंह डुंगरसिंह यांच्यासह प्रवास करत होते. या प्रवासादरम्यान भुसावळ रेल्वे स्थानकाजवळ बसण्याच्या कारणावरून काही जणांशी वादविवाद झाला.

दोघांपैकी एकाचा झाला होता मृत्यू –
यानंतर नंदुरबार येथे रेल्वे पोहचली असता, 8 ते 10 जणांच्या टोळक्याने रेल्वे डब्यात प्रवेश करुन सुमेरसिंह जबरसिंह यांच्या डाव्या पायाच्या मागील बाजूस चाकूने वार करून गंभीर जखमी करत परबतसिंह यांच्या पाठीवर चाकूने वार केले. दरम्यान याप्रकरणी लोहमार्ग पोलीस ठाण्यात गुन्हा दाखल करण्यात आला होता. दोघा जखमींना नंदुरबार जिल्हा रुग्णालयात दाखल करण्यात आले असता सुमेरसिंह जबरसिंह यांचा मृत्यू झाला आणि त्यामुळे गुन्ह्यात वाढीव कलम समाविष्ट करण्यात आले.

मृत्यूप्रकरणानंतर 9 जण ताब्यात –
लोहमार्ग व नंदुरबार पोलिसांनी गुन्ह्याचे गांभीर्य लक्षात घेत तपासाची चक्रे गतिमान केली. परिणामी संशयित विजय पगारे (36, रा.गौतमनगर, नंदुरबार), सोहिल शेख (28), रोहित पगारे (19), रूपेश कांबळे (30), एजाज शेख (24), जयदीप काशीकर (23), प्रथम उर्फ दादू पगारे (21), मिहीर अभंगे (21) आणि एक विधिसंघर्षित बालक यांना ताब्यात घेतले असून पुढील तपास सुरू केला आहे. तसेच गुन्ह्यात वापरलेला चाकू, लाकडी दांडादेखील पोलिसांकडून जप्त करण्यात आला आहे.

‘या’ पथकाने केली कारवाई –
नंदुरबार पोलीस अधीक्षक श्रवण दत्त एस. तसेच छत्रपती संभाजीनगर लोहमार्ग पोलीस अधीक्षक स्वाती भोर, लोहमार्ग मनमाड उपविभागीय पोलीस अधिकारी सूर्यकांत बांगर, नंदुरबार उपविभागीय पोलीस अधिकारी संजय महाजन यांच्या मार्गदर्शनाखाली स्थानिक गुन्हे शाखेचे निरीक्षक हेमंत पाटील, शहर पोलीस निरीक्षक अमित मनेळ, सहायक निरीक्षक गंभीरराव, राहुल शेजवळ, बसंत रॉय, संजय पाटील, हवालदार विकास पाटील, प्रकाश गोसावी, किरण बोरसे, कैलास चौधरी, जितेंद्र चौधरी यांच्या पथकाने ही कारवाई केली.