शहादा (नंदुरबार) : प्रसिद्ध शिव महापुराण कथाकार पंडित प्रदीप मिश्रा यांच्या कथेचे उद्यापासून नंदुरबार जिल्ह्यातील शहादा येथे आयोजन करण्यात आले आहे. या कथेची संपूर्ण तयारी पूर्ण झाली आहे. पत्रकार परिषदेत याबाबतची माहिती देण्यात आली.
पंडित प्रदीप मिश्रा यांच्या शिवपुराण कथेचे शहादा येथे आयोजन करण्यात आले आहे. उद्या १ एप्रिलपासून या शिवपुराण कथेला सुरुवात होणार आहे. तत्पूर्वी आज कथेच्या पूर्वसंध्येला तळोदा शहरात पंडित प्रदीप मिश्रा यांच्या शोभायात्रेचे आयोजन शिवपुराण कथा आयोजन समितीच्या वतीने करण्यात आले आहे.
आज सोमवारी सायंकाळी तळोदा शहरातील दत्तमंदिरापासून शोभायात्रेला सुरुवात होणार असून बिरसा मुंडा चौकात शोभायात्रेचा समारोप होणार आहे. परिसरातील शिवभक्तांसाठी ही मोठी पर्वणी ठरणार असून भाविकांमध्ये उत्साहाचे वातावरण दिसून येत आहे.
आमदार राजेश पाडवी काय म्हणाले?
नंदुरबार जिल्ह्यातील शहाद्याचे आमदार राजेश पाडवी यांनी सांगितले की, तळोदा शहर व तालुक्यातील माता-भगिनींना पंडित प्रदीप मिश्रा यांच्या दर्शनाचा लाभ व्हावा, महाराजांच्या प्रवचनामुळे भक्तिमय वातावरण निर्माण होईल. त्यांच्या संदेशातून व्यसनमुक्ती चळवळीला बळ मिळेल व अध्यात्माच्या माध्यमातून अप्रिय घटनांना आळा बसेल, असा विश्वासही आमदार राजेश पाडवींनी केला.
या कथेचा मोठ्या संख्येने भाविकांनी लाभ घ्यावा, असे आवाहन आमदार राजेश पाडवी, भाजपचे प्रदेश कार्यकारिणी सदस्य डॉ. शशिकांत वाणी, माजी नगराध्यक्ष अजय परदेशी, भाजपचे शहराध्यक्ष गौरव वाणी, जितेंद्र सूर्यवंशी, सागर कलाल, शिरीष माळी, तालुकाध्यक्ष प्रकाश वळवी आदींनी केले.
