जळगाव, 3 ऑगस्ट : जळगाव जिल्ह्यातील भडगाव तालुक्यात घडलेल्या घटनेने संपूर्ण जिल्हा हादरला आहे. भडगाव तालुक्यातील गोंडगाव येथील एका बालिका बेपत्ता झाली होती. यानंतर दोन दिवसांनी तिचा मृतदेह आढळून आला होता. तिच्यावर अत्याचार करुन तिचा खून झाल्याचे म्हटले जात होते. आता याप्रकरणातील संशयित आरोपीने आपला गुन्हा कबूल केला आहे. या घटनेमुळे जिल्ह्यात एकच संतापाची लाट उसळली आहे.
भडगाव तालुक्यातील संतापजनक घटना –
भडगाव तालुक्यातील गोंडगाव येथील एका 7 वर्षीय मुलीचा संशयास्पद मृतदेह मिळून आला होता. यानंतर संपूर्ण जिल्ह्यात एकच खळबळ उडाली होती. दरम्यान, याप्रकरणातील तपासात स्थानिक गुन्हे शाखेला (LCB) यश मिळाले आहे. या प्रकरणी मुलीवर लैंगिक अत्याचार करून खून करण्यात आल्याची माहिती समोर आली आहे. हा प्रकार गावातच राहणाऱ्या 19 वर्षीय तरुणाने केल्याचे उघड झाले आहे. दरम्यान, या नराधमाला बेड्या ठोकण्यात आल्या असून पुढील तपासासाठी भडगाव पोलीस स्टेशनच्या ताब्यात देण्यात आले आहे.
भडगाव तालुक्यातील गोंडगाव येथील 7 वर्षीय मुलगी रविवारी 30 रोजी सायंकाळी घरी मिळून आली नाही. त्यामुळे तिच्या पालकांनी तिच्या अपहरणाची तक्रार पोलीस ठाण्यात केली होती. यानंतर दोन दिवसांनी म्हणजे मंगळवारी 1 ऑगस्टला कुजलेल्या अवस्थेत या चिमुकलीचा मृतदेह त्यांच्या घराजवळील शेतकऱ्यांच्या कडबा कुट्टीत मिळून आला होता. यानंतर गावातील महिला तसेच नातेवाईकांनी भडगाव पोलीस स्टेशन गाठून आरोपीला कठोरात कठोर शिक्षा झाल्याशिवाय आम्ही अंत्यविधी करणार नसल्याचा पवित्रा घेतला होता.
आरोपीने केला गुन्हा कबूल –
दरम्यान, याप्रकरणी गावातीलच तरुण स्वप्नील विनोद पाटील याच्यावर पोलिसांना संशय आला होता. तसेच ज्या कडब्याच्या कुट्टीत मृतदेह मिळाला ती कुट्टी गोठ्यात होती. हा गोठा स्वप्नील पाटील याचा होता. त्यामुळे त्याच्यावर पोलिसांना संशय बळावल्याने त्याला स्थानिक गुन्हे अन्वेषण शाखेच्या पथकाने ताब्यात घेतले. सुरुवातीला त्याने उडवाउडवीची उत्तरे दिली. मात्र, पोलिसांनी अधिक सखोलपणे चौकशी केली असता, त्याने आपला गुन्हा कबूल केला.
चिमुकलीची निघृण हत्या –
दिनांक 30 जुलै रोजी आरोपी तरुणाने सदर मुलीला आमिष दाखवून संशयिताने त्याच्या गोठ्यात तिला बोलाविले. नंतर नराधमाने तिच्यावर लैंगिक अत्याचार केला. त्यानंतर प्रकरण उघड होऊ नये म्हणून तिच्या चेहऱ्यावर दगड मारून तिची निर्घृण हत्या केली. त्यानंतर मृतदेह त्याने गोठ्यातील कडब्याच्या कुट्टीखाली लपवून ठेवला होता. दरम्यान दोन दिवसांनी ग्रामस्थांना उग्र वास आल्याने प्रकरण उघड झाले. याप्रकरणी एलसीबीने संशयित आरोपी स्वप्नील विनोद पाटील याला अटक केली असून त्याची जिल्हा रुग्णालयात वैद्यकीय तपासणी करण्यात आली आहे. तसेच यानंतर पुढील कायदेशीर कार्यवाहीसाठी त्याला भडगाव पोलिसांच्या ताब्यात देण्यात आले आहे.
