धुळे, 10 डिसेंबर : सध्या राज्यात अनेक गुन्हैगारीच्या तसेच आत्महत्येच्या घटनांमध्ये वाढ होत आहे. यातच आता धुळे जिल्ह्यातून एक धक्कादायक घटना उघडकीस आली आहे. धुळे जिल्ह्यात एका पोलीस हवालदाराने टोकाचे पाऊल उचलले आहे. येथील एका 57 वर्षीय पोलीस हवालदाराने गळफास घेऊन आत्महत्या केली.
संपूर्ण घटना काय –
धुळे जिल्ह्यातील साक्री तालुक्यातील पोहबारा हे या आत्महत्या केलेल्या पोलीस हवालदाराचे गाव आहे. या त्याच्या मूळ गावी त्याने टोकाचे पाऊल उचलत आपले जीवन संपवले. काळूराम चैत्राम, असे या 57 वर्षीय पोलीस हवालदाराचे नाव आहे, अशी माहिती पोलिसांनी दिली आहे.
पोलिसांनी दिलेल्या माहितीनुसार, आत्महत्या केलेल्या पोलीस हवालदार यांना सुरक्षेसाठी मुंबईतील मंत्रालय, राज्य सचिवालयात तैनात करण्यात आले होते. मात्र, मागील काही दिवसांपासून ते त्यांच्या मूळ गावी होते. दरम्यान, त्यांचा मृतदेह हा त्यांच्या राहत्या घराच्या आवारात असलेल्या गोठ्यात गळफास घेतलेल्या असलेल्या अवस्थेत आढळला. अद्याप त्यांच्या आत्महत्येचे कारण समजू शकलेले नाही. याप्रकरणी पिंपळनेर पोलीस अधिक तपास करत आहेत.
