जामनेर, 12 जून : जिल्ह्यात गुन्हेगारीच्या घटनांमध्ये वाढ होत असताना जिल्ह्याला हादरवणारी धक्कादायक घटना समोर आली आहे. एका सहा वर्षीय चिमुकलीवर अत्याचार करत तिची हत्या करण्यात आली आहे. जामनेर तालुक्यातील चिंचखेड गाव शिवारात ही घटना घडल्याचे समोर आले आहे. नराधमाने चॉकलेटचे आमिष दाखवत घरात असलेल्या सहा वर्षीय मुलीला फुस लाऊन गावाबाहेर नेऊन तिच्यावर अत्याचार करत हत्या केल्याचे उघड झाले आहे.
काय आहे संपुर्ण बातमी? –
मिळालेल्या माहितीनुसार, जामनेर तालुक्यातील चिंचखेड गाव परिसरात राहणारे आदिवासी कुटुंब मजुरीसाठी बाहेर गेले होते. दरम्यान, या घटनेतील मुलीचे आई वडील मजुरी करुन घरी परतले असता त्यांना त्यांची मुलगी घरात दिसून आली नाही. त्यानंतर आई-वडिलांनी मुलीची शोधा शोध सुरु केली असता चिमुकल्या मुलीचा गावाबाहेर केळीच्या बागेत रक्तबंबाळ अवस्थेत मृतदेह आढळून आला.
आरोपीचा शोध सुरू –
नराधमाने चिमुकलीवर अत्याचार करत हत्या केल्याचा प्रकार काल रात्री 11 वाजता उघडकीस आल्यानंतर पोलिसांनी या घटनेचा तपास सुरु केला आहे. गावातील एका संशायित तरुणाचा शोध सुरु केला असून या घटनेत ज्या क्रूरतेने आरोपीने या बालिकेवर अत्याचार करुन तिची हत्या केली आहे ती पाहता आरोपीला कठोर शिक्षा करण्यात यावी, अशी मागणी जनतेने केली आहे.
हेही वाचा : रेल्वे बोगद्यातील साचलेल्या पाण्यात बुडून शेतकऱ्याचा मृत्यू, जळगाव जिल्ह्यातील धक्कादायक घटना
