ईसा तडवी, प्रतिनिधी
पाचोरा, 16 ऑक्टोबर : केंद्रीय निवडणूक आयोगाने महाराष्ट्र विधानसभा निवडणुकीचा कार्यक्रम जाहीर केला आहे. पाचोरा-भडगाव विधानसभा मतदारसंघात महसूल तसेच पोलीस प्रशासनात निवडणुकीच्या अनुषंगाने नोडल अधिकारी नेमण्यात आले आहेत. तसेच त्या सगळ्यांची सखोल पद्धतीने तयारी झाली असून निवडणुकीची प्रक्रिया शांततेत तसेच चांगल्या पद्धतीने पार पाडण्यासाठी प्रशासन सज्ज झाले असल्याची माहिती प्रांताधिकारी भूषण अहिरे यांनी दिली. पाचोऱ्यात आयोजित केलेल्या पत्रकार परिषदेत ते बोलत होते.
प्रांताधिकारी भूषण अहिरे यांची माहिती –
प्रांताधिकारी भूषण अहिरे पत्रकार परिषदेत बोलताना म्हणाले की, पाचोरा-भडगाव विधानसभा मतदारसंघ 18 यामध्ये 355 मतदान केंद्र आहेत. यासाठी 34 सेक्टर अधिकारी नेमले गेलेले आहेत. आणि मतदारसंघातील 3 लाख 31 हजारच्या जवळपास असलेल्या मतदारपर्यंत पोहचून त्यांच्याकडून जास्तीत जास्त मतदान करून घेण्याची जबाबदारी या सेक्टर अधिकाऱ्यांमार्फत पार पडणार आहे.
व्हिडिओ शूटिंगच्या माध्यमातून ठेवणार लक्ष –
भूषण अहिरे पुढे म्हणाले की, पाचोरा-भडगाव विधानसभा मतदारसंघात 18 ते 29 गटातील पहिल्यांदाच मतदान करणाऱ्यांची संख्या 8 हजार 160 इतकी आहे. 85 वर्षांवरील जेष्ठ नागरिकांची मतदार संख्या 3729 इतकी आहे. तसेच अपंग मतदारांची संख्या 1803 आहे. तृतीयपंथी मतदारांची संख्या 9 इतके आहे. 50 टक्क्यांहून अधिक मतदान केंद्रांवर आयोगाच्या सूचनेनुसार वेब कास्टिंग (व्हिडिओ शूटिंग) असणार आहे आणि ऑनलाईन पद्धतीने प्रांताधिकारी कार्यालयातून यावर लक्ष ठेवण्यात येणार आहे.
पहिल्या प्रक्रियेचा टप्पा प्रांताधिकारी कार्यालयात –
उमेदवारांचे अर्ज हे प्रांताधिकारी कार्यालयात स्विकारले जाणार आहे. तसेच अर्ज दाखल करण्यापासून ते अर्ज मागे घेण्याची प्रक्रिया म्हणजेच हा पहिला टप्पा प्रांताधिकारी कार्यालयात पार पडणार आहे. यानंतर मतमोजणी, ईव्हीएम स्ट्राँग रूम ही सगळी प्रकिया एमआयडीसीतील कारखान्याच्या गोडाऊनमध्ये पार पडणार असल्याची माहिती यावेळी प्रातांधिकारी भूषण अहिरे यांनी दिली.
हेही वाचा : मोठी बातमी! महाराष्ट्र विधानसभा निवडणूक जाहीर, ‘असे’ आहे संपुर्ण निवडणुकीचे वेळापत्रक
