नवी दिल्ली : भाजपचे राष्ट्रीय प्रवक्ते प्राध्यापक गौरव वल्लभ यांना पंतप्रधान नरेंद्र मोदी यांच्या आर्थिक सल्लागार परिषदेचे सदस्य म्हणून नामांकित करण्यात आले आहे. गेल्या अनेक दिवसांपासून याबाबत चर्चा सुरू होती. अखेर त्याला आता पूर्णविराम मिळाला असून गौरव वल्लभ हे पंतप्रधानांच्या आर्थिक सल्लागार परिषदेचे सदस्य बनले आहेत.
ही परिषद पंतप्रधानांना आर्थिक आणि संबंधित मुद्द्यांवर सल्ला देणारी सर्वोच्च संस्था आहे. यामध्ये आता अर्थतज्ज्ञ म्हणून प्राध्यापक गौरव वल्लभ यांची आर्थिक सल्लागार परिषदेचे सदस्य म्हणून नियुक्ती करण्यात आली आहे.
गौरव वल्लभ हे देशातील प्रसिद्ध अर्थशास्त्रज्ञ –
काँग्रेस सोडून भाजपमध्ये सामील झालेले प्राध्यापक गौरव वल्लभ यांना यापूर्वी भाजपचे प्रवक्ते बनवण्यात आले होते. आता पंतप्रधान मोदींनी त्यांना त्यांच्या टीममध्ये मोठी जबाबदारी दिली आहे. प्राध्यापक वल्लभ यांचा शैक्षणिक आणि व्यावसायिक अनुभव खूप समृद्ध आहे. त्यांनी देशातील अनेक प्रमुख भारतीय व्यवस्थापन संस्था (IIM) आणि आंतरराष्ट्रीय विद्यापीठांमध्ये अर्थशास्त्राचे अध्यापन केले आहे.
यासोबतच गौरव वल्लभ यांना वित्त आणि आर्थिक धोरण क्षेत्रातील तज्ज्ञ मानले जाते. त्यांचे 100 हून अधिक शोधनिबंध आहेत जे आंतरराष्ट्रीय जर्नल्समध्ये प्रकाशित झाले आहेत. ते भारतीय वर्तमानपत्रे आणि मासिकांमध्ये आर्थिक विषयांवर नियमितपणे लेख लिहितात. विशेष म्हणजे एखाद्या राजकारण्याच्या रिज्युममध्ये वित्त, चार्टर्ड अकाउंटंट, कंपनी सेक्रेटरी, पीएचडी, एमकॉम, एलएलबी यासारख्या गोष्टींचे एकत्रीकरण पाहणे दुर्मिळ आहे, ते गौरव वल्लभ यांच्या रिज्युममध्ये पाहायला मिळते.
एकेकाळी गौरव वल्लभ हे काँग्रेसचे प्रमुख वक्ते म्हणून ओळखले जायचे. मात्र, त्यांनी मागच्या वर्षी त्यांनी काँग्रेसला सोचचिठ्ठी दिली आणि भाजपमध्ये प्रवेश केला. भाजपचे जेष्ठ नेते विनोद तावडे यांनी त्यांना दिल्लीतील भाजप मुख्यालयात भारतीय जनता पक्षाचे सदस्यत्व दिले.
